மிராவின் கிச்சன்

கருணைக்கிழங்கு மசியல்

2012-01-22T21:57:00.000-08:00

தேவையானவை:
கருணைக்கிழங்கு 4
மஞ்சள் தூள்1 தேக்கரண்டி
இஞ்சி துருவல் 1 தேக்கரண்டி
எலுமிச்சம்பழம் 1

உப்பு,எண்ணெய் தேவையானது

கொத்தமல்லித்தழை சிறிதளவு
கருணைக்கிழங்கு

-------
தாளிக்க:
கடுகு 1 தேக்கரண்டி
உளுத்தம்பருப்பு 1 தேக்கரண்டி
கறிவேப்பிலை சிறிதளவு
------
செய்முறை:

கருணைக்கிழங்கை நன்றாக மண் போக அலசி விட்டு ஒவ்வொரு கிழங்கையும் நான்கு துண்டங்களாக வெட்டி குக்கரில் வைத்து மூன்று விசில் வந்ததும் அடுப்பை அணைக்கவும்.
குக்கரில் இருந்து எடுத்து கிழங்கின் தோலை உரித்துவிட்டு ஒரு அகண்ட பாத்திரத்தில் போட்டு நன்றாக மசித்துக்கொள்ளவும்.
வாணலியில் எண்ணெய் வைத்து கடுகு,உளுத்தம்பருப்பு,கறிவேப்பிலை தாளித்து மசித்த கருணைக்கிழங்குடன் தேவையான உப்பு,மஞ்சள் தூள் சேர்த்து கிளறவும்.இஞ்சித் துருவலையும் சேர்க்கவேண்டும்.
இறக்குவதற்கு முன்பு எலுமிச்சம்பழத்தை பிழிந்து நன்கு கலந்து கொத்தமல்லித்தழையை தூவி இறக்கவும்.
'கருணைக்கிழங்கு மசியல்' செய்வதற்கு மிகவும் சுலபம்,
உடல் சூட்டை தணிக்கும்.

புளி உப்புமா

2012-01-18T02:49:00.000-08:00

தேவையானவை:
புழுங்கலரிசி 1 கப்
தேங்காய் துருவல்1/2 கப்
மிளகாய் வற்றல் 3
சீரகம்1 தேக்கரண்டி
புளிஎலுமிச்சை அளவு
வெங்காயம் 2
கடலைபருப்பு1 மேசைக்கரண்டி
உப்பு,எண்ணெய்தேவையானது
---------
தாளிக்க:
கடுகு1தேக்கரண்டி
உளுத்தம்பருப்பு1தேக்கரண்டி
மிளகாய்வற்றல்2
கறிவேப்பிலைசிறிதளவு
--------
செய்முறை:

புழுங்கலரிசி,தேங்காய் துருவல்.சீரகம்,மிளகாய் வற்றல் நான்கையும் தனித்தனியாக தண்ணீரில் ஒரு மணி நேரம் ஊறவைக்கவேண்டும்.
முதலில் புளியை நார் நீக்கி அதனுடன் சிறிதளவு ஊறவைத்த அரிசி சேர்த்து அரைத்து பின்னர் ஊறவைத்த மற்ற பொருட்களையும் உப்பையும் சேர்த்து நைசாக அரைக்கவேண்டும். (இட்லி மாவு பதத்திற்கு இருக்கவேண்டும்)
வெங்காயத்தை பொடியாக நறுக்கவேண்டும்.கடலை பருப்பை தண்ணீரில் 10 நிமிடம் ஊறவைக்கவேண்டும்.
அரைத்த மாவை இட்லி தட்டில் ஆவியில் 15 நிமிடம் வைத்து எடுக்கவேண்டும். ஆறினதும் மீண்டும் மிக்சியில் வைத்து ஒரு சுற்று சுற்றவேண்டும்.
வாணலியில் எண்ணெய் வைத்து தாளிக்க வேண்டியவைகளை தாளித்து பொடியாக நறுக்கிய வெங்காயம்,ஊறவைத்த கடலை பருப்பு சேர்த்து வதக்கவேண்டும்.
(காரட்,பட்டாணியும் இதனுடன் சேர்க்கலாம்)
வெங்காயம் பொன்னிறமாக வதங்கியதும் மிக்சியில் அரைத்த 'புளி உப்புமா' வை சேர்த்து கிளற உதிரியாக வரும்.
இந்த ' புளி உப்புமா' தக்காளி சட்னியுடன் சாப்பிட மிகவும் சுவையாக இருக்கும்.

கடலைப்பருப்பு போளி

2012-01-13T04:29:00.000-08:00

தேவையானவை:
கடலைப்பருப்பு 1 கப்
தேங்காய் துருவல் 1/2கப்
துருவிய வெல்லம் 1கப்
நெய் 1/2 கப்
அரிசி மாவு 1 டேபிள்ஸ்பூன்
ஏலக்காய் தூள் 1 டீஸ்பூன்
உப்பு,எண்ணய் தேவையானது
-------
மைதாமாவு 1 கப்
மஞ்சள்தூள் 1 டீஸ்பூன்
உப்பு,எண்ணைய் தேவையானது
-------
செய்முறை:

மைதாமாவை சலித்து உப்பு,எண்ணைய்,மஞ்சள்தூள் சேர்த்து நன்கு பிசையவேண்டும்.ஒரு மணிநேரம் ஊறவைக்கவேண்டும்.
கடலைபருப்பை பத்து நிமிடம் தண்ணீரில் ஊறவைத்து வேகவைக்கவேண்டும்.நன்றாக வெந்ததும் வடிகட்டி அதனுடன் தேங்காய் துருவல்,பொடித்த வெல்லம்,ஏலக்காய் தூள் சேர்த்து மிக்சியில் நைசாக அரைக்கவேண்டும்.(தண்ணீர் விடவேண்டாம்)
வாணலியில் நெய் சேர்த்து அரைத்தவிழுது,அரிசி மாவு சேர்த்து நன்கு கிளற கடலைப்பருப்பு பூரணம் ரெடி.
மைதாமாவை சிறு சிறு உருண்டைகளாக்கி சப்பாத்திக்கு இடுவதுபோல இட்டு பூரணத்தை உள்ளே வைத்து மூடி கையால் தட்டவும்.ஒவ்வொரு உருண்டையையும் இது மாதிரி செய்யவேண்டும்.
அடுப்பில் தோசைக்கல்லை போட்டு சிறிது நெய் விட்டு ஒவ்வொரு போளியாக போட்டு இரண்டு பக்கமும் நன்கு வெந்ததும் எடுக்கவேண்டும்.

வெந்தய குருமா

2012-01-10T02:45:00.000-08:00

தேவையானவை:
வெந்தயம்1/2 கப்
பூண்டு10 பல்
வெங்காயம்2
பச்சைமிளகாய்2
தக்காளி2
புளிஎலுமிச்சை அளவு
பொடித்த வெல்லம்2 மேசைக்கரண்டி
கொத்தமல்லி தழைசிறிதளவு
உப்பு,எண்ணெய் தேவையானது
-------
அரைக்க:
உளுத்தம்பருப்பு1/4 கப்
சீரகம்1 தேக்கரண்டி
மிளகாய் வற்றல்3
தேங்காய் துருவல்1/2 கப்
-----
தாளிக்க:
கடுகு1 தேக்கரண்டி
கறிவேப்பிலைஒரு கொத்து
------
ஊறவைத்து வேகவைத்த வெந்தயம்

செய்முறை:
குருமா

வெந்தயத்தை 8 மணி நேரம் ஊறவைத்து வடிகட்டி வேகவைத்துக் கொள்ளவேண்டும்.
வெங்காயம்,தக்காளி இரண்டையும் பொடியாக நறுக்கிக் கொள்ளவேண்டும்.
பச்சைமிளகாயை குறுக்கு வாட்டில் கீறிக்கொள்ளவும்.
அரைக்கக் கொடுத்துள்ளவைகளை எண்ணையில் வறுத்து விழுது போல அரைத்துக் கொள்ளவும்.
புளியை அரைகப் தண்ணீரில் கரைத்து வடிகட்டவும்.
--------
அடுப்பில் வாணலியை வைத்து எண்ணய் சேர்த்து தாளிக்க வேண்டியவைகளை தாளித்து பூண்டு,வெங்காயம்,தக்காளி,பச்சைமிளகாய் நான்கையும் வதக்கவேண்டும்.
வெங்காயம் பொன்னிறமாக வந்தவுடன் வேகவைத்துள்ள வெந்தயம்,அரைத்த விழுது,புளித்தண்ணீர்,உப்பு எல்லாம் சேர்த்து கொதிக்கவைக்கவேண்டும்.
எல்லாம் சேர்ந்து நன்கு கொதித்தவுடன் பொடித்த வெல்லத்தை சேர்த்து கொத்தமல்லித்தழையை தூவி இறக்கவேண்டும்.
வெந்தய குருமாவை சாதத்தோடு பிசைந்து சாப்பிடலாம்.பூரி சப்பாத்திக்கும் ஏற்றது.
வெந்தய குருமா நீரிழிவுகாரர்களுக்கு சிறந்தது.

திருவாதிரை களி

2012-01-07T05:46:00.000-08:00

ஆருத்ரா தரிசனம் 08-01-2012 அன்று வருகிறது.அன்று செய்யப்படுவது இது.

தேவையானவை:

பச்சரிசி 2 கப்
பயத்தம்பருப்பு ஒரு பிடி
கடலைபருப்பு 1/2 கப்
தண்ணீர் 6 கப்

வெல்லம் பொடித்தது 2 1/2 கப்
துருவிய தேங்காய் 1 கப்
முந்திரிபருப்பு 10
நெய் 1/4 கப்
ஏலக்காய் 5

செய்முறை:

பச்சரிசி,பருப்புகள் ஒவ்வொன்றையும் தனித்தனியாக எண்ணய் விடாமல் சிவக்க வறுத்து மிக்ஸீயில் மூன்றையும் சேர்த்து கரகரப்பாக பொடி ரவையாக அரைத்துக்கொள்ளவேண்டும்.

ஒரு அகண்ட பாத்திரத்தை எடுத்துக்கொண்டு அதில் 6 கப் தண்ணீர் விட்டு அடுப்பில் வைத்து சிறிது கொதித்தவுடன் பொடித்த வெல்லத்தைப்போடவேண்டும்.வெல்லம் கரைந்தவுடன்
தேங்காய் துருவலை அப்படியே பச்சையாகப்போட்டு அதனுடன் இரண்டு ஸ்பூன் நெய் விடவேண்டும்.தள தள என்று கொதித்தவுடன் அடுப்பை slim ல் வைத்து அரைத்துவைத்த அரிசி பருப்புரவையை தூவிக்கொண்டே கிளறவும்.பின்னர் மூடிவைத்து அடிக்கடி அடிபிடிக்காமல் கிளறவும். நன்றாக வெந்தவுடன் முந்திரிபருப்பை வறுத்துப்போட்டு மீதமுள்ள நெய்யையும் விட்டு ஏலக்காய் பொடியைியும் போட்டு நன்றாக கிளறி இறக்கவும்.

இறக்கிய பின் விட்டு விட்டு இரண்டு தடவை கிளறினால் "பொல பொல" என்று உதிர்ந்து வரும்.

அன்று, இதனுடன் குறைந்தது 7 காய்கள் போட்டு கூட்டு செய்வதுண்டு.

குடலை இட்லி

2012-01-04T21:56:00.000-08:00

தேவையானவை:
பயத்தம்பருப்பு 1 கப்
உளுத்தம்பருப்பு 1 கப்
தொன்னை 10
உப்பு,எண்ணெய் தேவையானது
-------
மிளகு 1 தேக்கரண்டி
சீரகம் 1 தேக்கரண்டி
கடலைபருப்பு 1 மேசைக்கரண்டி
பெருங்காயம் 1 துண்டு
பச்சைமிளகாய் 4
இஞ்சி 1 துண்டு
முந்திரிபருப்பு 10
தேங்காய் துண்டுகள் 10
நெய் 1 மேசைக்கரண்டி
கறிவேப்பிலை சிறிதளவு
கொத்தமல்லித்தழை சிறிதளவு
தொன்னையில் இட்லி மாவு

செய்முறை:

பயத்தம்பருப்பு,உளுத்தம்பருப்பு இரண்டையும் இரண்டு மணிநேரம் தண்ணீரில் ஊறவைக்கவேண்டும். ஊறினபின் இரண்டையும் ' கொட கொட' என்று அரைத்து தேவையான உப்பு போட்டு கரைத்து வைக்கவும்.அரைத்த மாவு இட்லி மாவு பதத்திற்கு இருக்கவேண்டும்.அதை 8 மணி நேரம் கழித்து உபயோகப்படுத்த வேண்டும்.
மிளகு,சீரகம் இரண்டையும் மிக்சியில் ஒரு சுற்று சுற்றவேண்டும்.
இஞ்சி பச்சைமிளகாய் இரண்டையும் பொடியாக நறுக்கிக்கொள்ளவேண்டும்.
-----------
வாணலியில் நெய்வைத்து காய்ந்ததும் முந்திரிபருப்பை வறுக்கவேண்டும்.
அதனுடன் நறுக்கிய இஞ்சி,பச்சைமிளகாய் உடைத்த மிளகு,சீரகம் போட்டு வதக்கவேண்டும்.
கடலைபருப்பை அரைமணி நேரம் தண்ணீரில் ஊறவைத்து வடிகட்டி இதனுடன் சேர்க்கவேண்டும்.
தேங்காய் துண்டுகளையும் இதனுடன் சேர்த்து எல்லாவற்றையும் சேர்த்து வதக்கி அப்படியே மாவில் சேர்க்கவேண்டும்.
இப்பொழுது ' குடலை இட்லி மாவு ' ரெடி.
----------
தொன்னையை எடுத்துக்கொண்டு அதில் நன்றாக எண்ணெய் தடவவேண்டும்,முக்கால் பாகத்திற்கு மாவை விட்டு தொன்னையுடன் அப்படியே இட்லி தட்டில் வைத்து
குக்கரில் 15 நிமிடம் ஆவியில் வைத்து எடுக்கவேண்டும்.
'குடலை இட்லி' யை அப்படியே சாப்பிடலாம்.
வேண்டுமென்றால் தேங்காய் சட்னி,தக்காளி சட்னி side dish ஆக வைத்துக்கொள்ள்லாம்.

தூள் முறுக்கு....

2012-01-03T02:57:00.000-08:00

தேவையானவை:

அரிசி மாவு 1 கப்
பொட்டுக்கடலை மாவு 1 கப்
கடலை மாவு 1 கப்
சீரகம் 1 தேக்கரண்டி
வெண்ணெய் 1 மேசைக்கரண்டி
பெருங்காயத்தூள் 1 தேக்கரண்டி
உப்பு,எண்ணய் தேவையானது
-----------
செய்முறை:
ஒரு அகண்ட பாத்திரத்தை எடுத்துக்கொண்டு அதில் அரிசி மாவு,பொட்டுக்கடலை மாவு,கடலை மாவு மூன்றையும் சேர்த்து அதனுடன் சீரகத்தை உள்ளங்கையால் தேய்த்து தேவையான உப்பு,பெருங்காயத்தூளுடன் சிறிது தண்ணீர் சேர்த்து நன்கு பிசையவேண்டும பிசைந்த மாவு சப்பாத்தி மாவு பதத்திற்கு இருக்கவேண்டும்.

அடுப்பில் வாணலியை வைத்து அதில் தேவையான அளவு எண்ணெய் சேர்த்து எண்ணெய் காய்ந்ததும் தேங்குழல் படியில் முறுக்கு அச்சில் பிசைந்த மாவை சிறிதளவு சேர்த்து எண்ணெயில் பிழியவேண்டும்.இருபுறமும் சிவந்ததும் எடுக்கவேண்டும்.

இந்த முறுக்கு செய்வதற்கும் எளிது ருசியாகவும் இருக்கும்.

சேமியா...பால்...டிலைட்...

2012-01-01T07:21:00.000-08:00

அனைவருக்கும் இனிய புத்தாண்டு வாழ்த்துகள்.புத்தாண்டினை ஒரு இனிப்புடன் தொடங்குவோம்.

தேவையானவை:
பால் 2 கப்
சேமியா 1/2 கப்
பாதாம் 10
முந்திரிபருப்பு 10
சர்க்கரை 1 கப்
பேரீச்சம்பழம் 4
நெய் 1 மேசைக்கரண்டி
------
செய்முறை:
பாதாம்,முந்திரி சேமியா மூன்றையும் நெய்யில் தனித்தனியாக பொன்னிறமாக வறுக்கவேண்டும்.
சர்க்கரையுடன் சிறிது தண்ணீர் சேர்த்து அடுப்பில் வைத்து கம்பிப்பாகு வந்தவுடன் இறக்கவும்.
பாலை ஒரு அகண்ட பாத்திரத்தில் வைத்து இரண்டு கப் ஒரு கப் ஆகும் வரை காய்ச்சவேண்டும்.
கொதித்த பாலுடன் சர்க்கரைபாகையும்,சேமியாவையும் சேர்த்து கிளறவேண்டும்.
சேமியா நன்கு வெந்தவுடன் வறுத்த பாதாம்,முந்திரி சேர்க்கவும்.
சேமியா..பால்..டிலைட்... திக்காக வந்தவுடன் பேரீச்சம்பழத்தை பொடியாக நறுக்கி அதனுடன் சேர்த்து ஒரு கிளறு கிளறி இறக்கவேண்டும்.

இட்லி கார கறி

2011-12-26T21:53:00.000-08:00

தேவையானவை:

இட்லி துண்டுகள் 20
எண்ணைய் தேவையானது
---------
அரைக்க:
தேங்காய் துருவல் 1கப்
தனியா 1 மேசைக்கரண்டி
பொட்டுக்கடலை 1 மேசைக்கரண்டி
சீரகம் 1 தேக்கரண்டி
மிளகாய் வற்றல் 3
---------
தாளிக்க:
கடுகு 1 தேக்கரண்டி
உளுத்தம்பருப்பு 1 தேக்கரண்டி
கறிவேப்பிலை சிறிதளவு
----------
செய்முறை:
அரைக்க கொடுத்துள்ளவைகளை வறுத்து சிறிது தண்ணீர் விட்டு விழுதுபோல அரைத்துக்கொள்ளவும்.
ஒரு அகண்ட தட்டை எடுத்துக்கொண்டு அதில் இட்லி துண்டுகள்,அரைத்த விழுது,சிறிது எண்ணைய் மூன்றையும் சேர்த்து நன்கு பிசிறவும்.
வாணலியில் எண்ணைய் வைத்து தாளிக்க வேண்டியவைகளை தாளித்து பிசறி வைத்துள்ள இட்லி துண்டுகளை சேர்த்து பிரட்டவும்.
சிறிது எண்ணெய் சேர்த்து பொன்னிறமாக வந்தவுடன் அடுப்பை அணைக்கவும்.

சாதாரண இட்லி சாப்பிடுவதை விட இதை ஒரு ஸ்நாக்காக நினைத்து குழந்தைகள் விரும்பி சாப்பிடுவார்கள்.

கல்கியில் என் சமையல் குறிப்பு

2011-12-22T02:55:00.000-08:00

கல்கியில் வெளியான "பாரம்பரிய சமையல்" மெகா போட்டியில் எனது "குடலை இட்லி " என்ற சமையல் குறிப்பு

தேர்ந்தெடுக்க பட்டுள்ளது என்பதை மகிழச்சியுடன் அனைவருக்கும் தெரிவித்துக்கொள்கிறேன்.

நன்றி.

வடைகள்......பலவிதம்

2011-12-18T18:06:00.000-08:00

மசால் வடை

1.உளுந்து வடை
தேவையானவை:
உளுத்தம்பருப்பு 1 கப்
இஞ்சி 1 துண்டு
பச்சைமிளகாய் 2
மிளகு 1 தேக்கரண்டி
சீரகம் 1/2 தேக்கரண்டி
பெருங்காயத்தூள் 1/2 தேக்கரண்டி
கறிவேப்பிலை ஒரு கொத்து
உப்பு,எண்ணய் தேவையானது
-----
செய்முறை:
உளுத்தம்பருப்பை அரை மணி நேரம் தண்ணீரில் ஊறவைத்து வடிகட்டி நைசாக அரைக்கவும்.இத்துடன் மிளகு,சீரகம் இரண்டையும் பொடித்து போடவும்.இஞ்சி,பச்சைமிளகாய் இரண்டையும் பொடியாக நறுக்கிப் போடவும்.தேவையான உப்பு,பெருங்காயத்தூள்,கறிவேப்பிலை சேர்த்து எல்லாவற்றையும் நன்கு கலக்கவும்.
வாணலியில் எண்ணைய் வைத்து காய்ந்ததும் மாவை வடை மாதிரி தட்டி நடுவில் ஓட்டையிட்டு எண்ணையில் போட்டு இருபுறமும் நன்றாக வெந்ததும் எடுக்கவும்.
-------------------------------------------
2. தயிர் வடை

தேவையானவை:
உளுந்து வடை 10
கெட்டி தயிர் 2 கப்
பச்சைமிளகாய் 4
சின்னவெங்காயம் 6
இஞ்சி 1 துண்டு
கடுகு 1 தேக்கரண்டி
கறிவேப்பிலை சிறிதளவு
கொத்தமல்லித்தழை சிறிதளவு
உப்பு,எண்ணைய் தேவையானது
----
செய்முறை:
தயிரை உப்பு சேர்த்து கடைந்து கொள்ளவும்.
வாணலியில் எண்ணைய் வைத்து கடுகு தாளித்து பொடியாக நறுக்கிய பச்சைமிளகாய்,வெங்காயம்,இஞ்சி மூன்றையும் வதக்கி தயிரில் சேர்க்கவும்.
பின்னர் ரெடியாக உள்ள உளுந்து வடைகளை சேர்த்து ஊறவைக்கவும்.
-------------------------------------------
3.அரிசி துவரம் வடை

தேவையானவை:
புழுங்கலரிசி 1 கப்
துவரம்பருப்பு 1/4 கப்
வெங்காயம் 1
தனியா 1 தேக்கரண்டி
மிளகாய் வற்றல் 2
இஞ்சி 1 துண்டு
கறிவேப்பிலை சிறிதளவு
கொத்தமல்லித்தழை சிறிதளவு
உப்பு,எண்ணைய் தேவையானது
-------
செய்முறை:
அரிசி பருப்பு இரண்டையும் ஒரு மணி நேரம் தண்ணீரில் ஊறவைக்கவேண்டும்.
பின்னர் வடிகட்டி இதனுடன் தனியா,மிளகாய் வற்றல்,இஞ்சி தேவையான உப்புசேர்த்து ரவை பதத்துக்கு அரைத்து கடைசியில் வெங்காயத்தை சேர்த்து ஒரு சுற்று சுற்றி கறிவேப்பிலை,கொத்தமல்லித்தழை சேர்த்து வடை தட்ட வேண்டும்.
---------------------------------------------
4.ஆம வடை

தேவையானவை:
கடலைப்பருப்பு1 கப்
சோம்பு 1 தேக்கரண்டி
வெங்காயம் 1
பச்சைமிளகாய் 2
இஞ்சி 1 துண்டு
கறிவேப்பிலை சிறிதளவு
கொத்தமல்லித்தழை சிறிதளவு
உப்பு,எண்ணெய் தேவையானது
------
செய்முறை:
கடலைப்பருப்பை இரண்டு மணி நேரம் தண்ணீரில் ஊறவைக்கவேண்டும்.பின்னர் வடிகட்டி அதனுடன் சோம்பு சேர்த்து கெட்டியாக தண்ணீர் தெளித்து அரைக்கவேண்டும்.
அரைத்த மாவில் பொடியாக நறுக்கிய வெங்காயம்,பச்சைமிளகாய்,இஞ்சி,கறிவேப்பிலை,கொத்தமல்லித்தழை எல்லாம் சேர்த்து வடை தட்டவேண்டும்.
-------------------------------------------------
5. மசால் வடை

தேவையானவை:
கடலைப்பருப்பு 1 கப்
உளுத்தம்பருப்பு 1 மேசைக்கரண்டி
பச்சரிசி 1 மேசைக்கரண்டி
சீரகம் அல்லது சோம்பு 1 தேக்கரண்டி
சின்ன வெங்காயம் 5
மிளகாய் வற்றல் 3
பெருங்காயம் 1 துண்டு
கறிவேப்பிலைசிறிதளவு
உப்பு,எண்ணெய் தேவையானது
-----------
செய்முறை:
கடலைப் பருப்பு,உளுத்தம்பருப்பு,பச்சரிசி மூன்றையும் ஒரு மணி நேரம் ஊறவைக்கவேண்டும்
வடிகட்டி இதனுடன் மிளகாய் வற்றல்.பெருங்காயம் சேர்த்து அரைக்கவேண்டும்.
அரைத்த மாவில் தேவையான உப்பு,நறுக்கிய வெங்காயம்,சோம்பு,கறிவேப்பிலை சேர்த்து நன்றாக கலந்து வடைகளாக தட்ட வேண்டும்.
--------------------------------------------------
6. தேங்காய் வடை

தேவையானவை:
புழுங்கலரிசி 1 கப்
தேங்காய் துருவல் 1/2 கப்
உளுத்தம்பருப்பு,கடலைபருப்பு,பாசிப்பருப்பு ஒவ்வொன்றும் 2 மேசைக்கரண்டிகள்
பச்சைமிளகாய்2
கறிவேப்பிலை சிறிதளவு
கொத்தமல்லித்தழை சிறிதளவு
உப்பு,எண்ணெய் தேவையானது
-------
செய்முறை:
அரிசி,உளுத்தம்பருப்பை தனியாக ஒரு மணி நேரம் தண்ணீரில் ஊறவைக்கவேண்டும்.
கடலை பருப்பு,பாசிப்பருப்பு இரண்டையும் தனியாக ஊறவைக்கவேண்டும்.
------
அரிசி,உளுத்தம்பருப்புடன் தேங்காய் துருவல்,பச்சைமிளகாய் உப்பு சேர்த்து சற்று கரகரப்பாக அரைத்துக்கொள்ளவேண்டும்.
அதனுடன் பாசிபருப்பு,கடலைபருப்பு இரண்டையும்சேர்த்து ஒரு சுற்று சுற்றவேண்டும்.
அரைத்த மாவில் கறிவேப்பிலை,கொத்தமல்லித்தழை சேர்த்து உளுந்து வடை மாதிரி நடுவில் ஓட்டையிட்டு எண்ணையில் போட்டு எடுக்கவேண்டும்.
------------------------------------------------------------
7. வாழைத்தண்டு வடை

தேவையானவை:
வாழைத்தண்டு 1
பச்சைமிளகாய்3
பொட்டுக்கடலை மாவு 1 மேசைக்கரண்டி
வெங்காயம் 1
கொத்தமல்லித்தழை சிறிதளவு
கறிவேப்பிலை சிறிதளவு
உப்பு,எண்ணெய் தேவையானது
----------
செய்முறை:
வாழைத்தண்டை பொடியாக நறுக்கி மஞ்சள்தூள் சேர்த்து குக்கரில் வைத்து 2 விசில் வந்ததும் இறக்கவேண்டும்.
ஆறினவுடன் மிக்சியில் கரகரவென்று அரைக்கவும்.
அதனுடன் நறுக்கிய பச்சைமிளகாய்,வெங்காயம் பொட்டுக்கடலை மாவு,,கொத்தமல்லித்தழை,கறிவேப்பிலை,உப்பு சேர்த்து நன்றாக பிசறி சிறு சிறு வடைகளாக தட்டி எண்ணெயில் போட்டு எடுக்கவேண்டும்..
----------------------------------------
8. பொட்டுக்கடலை வடை

தேவையானவை:
பொட்டுக்கடலை 1 கப்
நிலக்கடலை 1/2 கப்
மிளகுத்தூள் 1 தேக்கரண்டி
கறிவேப்பிலை சிறிதளவு
கொத்தமல்லித்தழை சிறிதளவு
உப்பு,எண்ணெய் தேவையானது
------
செய்முறை:
பொட்டுக்கடலையையும்,நிலக்கடலையையும் லேசாக வறுத்து கரகரவென்று பொடித்துக்கொள்ளவும்.
அதில் மிளகுத்தூள்,உப்பு,கறிவேப்பிலை,கொத்தமல்லித்தழை சிறிது தண்ணீர் தெளித்து பிசைந்து வடைகளாக தட்டவும்.
---------------------------------------------
9.முட்டைக்கோஸ் வடை

தேவையானவை:
துருவிய முட்டைக்கோஸ் 2 கப்
பயத்தம்பருப்பு 1 கப்
கடலைப்பருப்பு 1/2 கப்
வெங்காயம் 1
சீரகம் 1தேக்கரண்டி
பச்சைமிளகாய் 2
கறிவேப்பிலை சிறிதளவு
கொத்தமல்லித்தழை சிறிதளவு
உப்பு,எண்ணெய் தேவையானது
--------
செய்முறை:
பயத்தம்பருப்பையும் கடலைப்பருப்பையும் தனித்தனியாக ஊறவைக்கவேண்டும்.
பயத்தம்பருப்பை மிருதுவாகவும் கடலைபருப்பை கரகரவென்றும் அரைக்கவேண்டும்.
முட்டைக்கோஸுடன் சிறிது உப்பு சேர்த்து தண்ணீர் தெளித்து ஊறவைக்கவேண்டும்.
--------
ஒரு பாத்திரத்தில் அரைத்த இரண்டு மாவையும் சேர்த்து அதில் முட்டைக்கோஸை வடித்து சேர்த்து அதனுடன் பொடியாக நறுக்கிய் வெங்காயம்,பச்சைமிளகாய்,சீரகம்,கொத்தமல்லித்தழை,கறிவேப்பிலை,சிறிது உப்பு பிசைந்து (தண்ணீர் விட வேண்டாம்) வடைகளாக தட்டவும்.
முட்டைக்கோஸுக்கு பதிலாக எந்த வகைக் கீரையையும் சேர்க்கலாம், கீரையை பொடியாக நறுக்கி சேர்த்தால் போதும்.
---------------------------------------------------
10.ஜவ்வரிசி வடை

தேவையானவை:
ஜவ்வரிசி 3/4 கப்
கடலைப்பருப்பு 1 கப்
உருளைக்கிழங்கு 2
வெங்காயம் 1
சோம்பு 1 தேக்கரண்டி
பச்சைமிளகாய் 2
கறிவேப்பிலை சிறிதளவு
உப்பு,எண்ணெய் தேவையானது
-------
செய்முறை:
ஜவ்வரிசியையும் கடலைப்பருப்பையும் தனித்தனியே அரை மணி நேரம் ஊறவைக்கவேண்டும்.
உருளைக்கிழங்கை தோலுரித்து வேகவைத்து மசித்து வைக்கவேண்டும்.
கடலைப்பருப்பை வடிகட்டி அதனுடன் சோம்பு,உப்பு சேர்த்து அரைக்கவேண்டும்.
அரைத்த மாவில் மசித்த உருளைக்கிழங்கு,வடிகட்டிய ஜவ்வரிசி,நறுக்கிய வெங்காய்ம்,பச்சைமிளகாய்,கறிவேப்பிலை எல்லாம் நன்கு கலந்து வடைகளாக தட்டவேண்டும்

பைன் ஆப்பிள் ரசம்

2011-12-15T02:51:00.000-08:00

தேவையானவை: பைன் ஆப்பிள்
பைன் ஆப்பிள் 2 பத்தை
துவரம்பருப்பு 1/2 கப்
புளி எலுமிச்சை அளவு
பெருங்காயம் ஒரு துண்டு
உப்பு தேவையானது

அரைக்க:
வற்றல் மிளகாய் 3
தனியா 1 டீஸ்பூன்
மிளகு 1 டீஸ்பூன்
கடலைபருப்பு 1 டீஸ்பூன்
துவரம்பருப்பு 1 டீஸ்பூன்
சீரகம் 1/2 டீஸ்பூன்

தாளிக்க:
கடுகு,கறிவேப்பிலை,நெய்

செய்முறை:

அரை கப் துவரம்பருப்பை குக்கரில் ஒரு கப் தண்ணீரில் வைத்து மூன்று விசில் வந்தவுடன் இறக்கிவைக்கவும்.
புளியை ஒரு கப் தண்ணீரில் ஊறவைத்து வடிகட்டி அதில் பெருங்காயம்,உப்பு போட்டு கொதிக்கவைக்கவும்.
வற்றல் மிளகாய்,தனியா,மிளகு,கடலைபருப்பு,துவரம்பருப்பு இவற்றை சிறிது எண்ணைய் விட்டு வறுத்து
அரைத்து கடைசியில் சீரகத்தை பச்சையாக வைத்து விழுதுபோல அரைத்து வைக்கவும்.
புளிஜலம் நன்றாக கொதித்தவுடன் அரைத்த விழுதைப்போட்டு சிறிது கொதித்த பின் வேகவைத்த பருப்பைப்போட்டு
கொதிக்கவைக்கவும்.
நன்றாக கொதி வந்தவுடன் pineapple
பத்தையை தோலை எடுத்துவிட்டு mixyல் நன்றாக சிறிது தண்ணீர் விட்டு அரைத்து
வடிகட்டி விடவும்.ஒரு நிமிடம் கழித்து இறக்கவும்.(பைன் ஆப்பிள் சாற்றை விட்டவுடன் ரசம் கொதிக்கவேண்டாம்.)
கடைசியில் வாணலியில் நெய் வைத்து கடுகு,கறிவேப்பிலை தாளிக்கவும்.
இந்த ரசத்திற்கு தக்காளி சேர்ப்பதில்லை

வற்றல்....காரக்குழம்பு

2011-12-11T21:57:00.000-08:00

தேவையானவை:
சின்ன வெங்காயம் 10
பூண்டு 5 பல்
சாம்பார் பொடி 1 மேசைக்கரண்டி
புளி 1 எலுமிச்சை அளவு
பெருங்காயத்தூள் 1 தேக்கரண்டி
உப்பு,நல்லெண்ணைய் தேவையானது
------
அரைக்க:
சின்ன வெங்காயம் 5
பூண்டு 3 பல்
தக்காளி 1
சுண்டைக்காய் வற்றல் 5
தேங்காய் 1 துண்டு
-------
பொரிக்க:
மணத்தக்காளி வற்றல் 1 மேசைக்கரண்டி
சுண்டைக்காய் வற்றல் 10
மிதுக்க வற்றல் 10
-------
தாளிக்க:
கடுகு 1 தேக்கரண்டி
வெந்தயம் 1/2 தேக்கரண்டி
கறிவேப்பிலை சிறிதளவு
------
செய்முறை:
அரைக்க கொடுத்துள்ள பொருட்களில் சின்ன வெங்காயம்,பூண்டு,தக்காளி மூன்றையும் எண்ணையில் வதக்கவேண்டும்.
சுண்டைக்காய் வற்றலை எண்ணையில் பொரித்தெடுத்து தேங்காய் துண்டுடன் எல்லாவற்றையும் சேர்த்து விழுது போல அரைத்து வைத்துக்கொள்ளவேண்டும்.
-----
அடுப்பில் வாணலியை வைத்து நல்லெண்ணைய் சேர்த்து தாளிக்க வேண்டியவைகளை தாளித்து சின்ன வெங்காயம் பூண்டு இரண்டையும் வதக்கவேண்டும்.
புளியை இரண்டு கப் தண்ணீரில் கரைத்து சாம்பார் பொடி,பெருங்காயத்தூள்,உப்பு சேர்த்து கொதிக்கவிடவேண்டும்.
பின்னர் அரைத்த விழுதினை சேர்த்து நன்கு கொதித்தவுடன் இறக்கவேண்டும்.
பொரிக்க கொடுத்துள்ள வற்றல்களை எண்ணையில் பொரித்து சேர்க்கவேண்டும்.
(வற்றல்களில் ஏற்கனவே உப்பு இருப்பதால் அரை உப்பு போட்டால் போதும்)
இந்த வற்றல்..காரக்குழம்பு மற்ற வத்தக்குழம்பு /காரக்குழம்பை விட சுவை கூடுதலாக இருக்கும்.
சாதத்தோடு பிசைந்து சாப்பிடலாம்.தயிர் சாதத்திற்கும் ஏற்றது.

அப்பம் (மூன்று வகை)

2011-12-07T22:18:00.000-08:00

அப்பம் 1

தேவையானவை:
பச்சரிசி 1 கப்
வெல்லம் 1/2 கப் (பொடித்தது)\
உளுத்தம்பருப்பு 1 தேக்கரண்டி
வாழைப்பழம் 1
ஏலக்காய் தூள் 1 தேக்கரண்டி

செய்முறை:
அரிசியை இரண்டு மணி நேரம் ஊறவைக்கவேண்டும்.
பின்னர் நைசாக அரைக்கவேண்டும்.
அதனுடன் பொடித்த வெல்லத்தையும் வாழைப்பழத்தையும் சேர்த்து அரைக்கவேண்டும்.
இட்லி மாவு பதம் இருக்கவேண்டும். அதனுடன் ஏலக்காய் தூள் சேர்க்கவேண்டும்.
வாணலியில் எண்ணைய் வைத்து நன்கு காய்ந்ததும் அடுப்பை ஸ்லிம்மில் வைத்து ஒரு கரண்டியில் மாவை எடுத்து ஊற்றி
இருபக்கமும் பொன்னிறமாக வந்ததும் எடுக்கவேண்டும்.
---------------------
அப்பம் 2.

தேவையானவை:
மைதா மாவு 1கப்
அரிசிமாவு 1 மேசைக்கரண்டி
வெல்லம் 3/4 கப் (பொடித்தது)
வாழைப்பழம்1
ஏலக்காய் தூள் 1 தேக்கரண்டி

செய்முறை:
வெல்லத்தை ஒரு கரண்டி தண்ணீரில் பத்து நிமிடங்கள் வைக்க கரைந்துவிடும்.
ஒரு பாத்திரத்தை எடுத்துக்கொண்டு அதில் மைதாமாவு,அரிசிமாவு,வாழைப்பழம்,ஏலக்காய் தூள் சேர்த்து
தண்ணீர் விடாமல் பிசைய வேண்டும்.
கரைத்த வெல்லத்தை இதனுடன் சேர்த்து பிசைய வேண்டும்.கொஞ்சம் தண்ணீர் சேர்த்து மாவு இட்லி மாவு பதம் இருக்கவேண்டும்.
முதல் வகையில் கூறியபடி எண்ணெயில் மாவை ஊற்றி எடுக்கவேண்டும்.

-----------------------------
அப்பம் 3
தேவையானவை:
கோதுமைமாவு 1 கப்
அரிசிமாவு 1 மேசைக்கரண்டி
வெல்லம் 3/4 கப் (பொடித்தது)
வாழைப்பழம்1
ஏலக்காய் தூள் 1 தேக்கரண்டி

செய்முறை:
அப்பம் 2 ல் கூறியபடி மாவை கலந்து (மைதா மாவுக்கு பதில் கோதுமை மாவு) எண்ணெயில் ஊற்றி எடுக்கவேண்டும்.

பட்டர் குல்சா

2011-12-05T18:07:00.000-08:00

தேவையானவை:
மைதாமாவு 2 கப்
dry yeast 1 டீஸ்பூன்
சர்க்கரை 1 டீஸ்பூன்
வெண்ணைய் 1/4 கப்
உப்பு,எண்ணைய் தேவையானது

செய்முறை:

ஒரு பாத்திரத்தில் சிறிது வென்னீர் எடுத்துக்கொண்டு அதில் dry yeast யும் சர்க்கரையையும் சேர்த்து கலக்கவேண்டும்.
பத்து நிமிடம் தனியே வைக்கவேண்டும்.

ஒரு அகண்ட பாத்திரத்தில் மைதாமாவு,உப்பு.yeast கலவை மூன்றையும் சேர்த்து கை விரல்களால் கிளறி வெதுவெதுப்பான தண்ணீர் சேர்த்து
மாவை தளர பிசைய வேண்டும்.ஒரு டேபிள்ஸ்பூன் எண்ணைய் சேர்த்து பிசைந்து இரண்டு மணிநேரம் ஊறவைக்கவேண்டும்.

பிசைந்த மாவை உருண்டைகளாக்கி சற்று கனமாக இடவேண்டும்.பின்னர் ஒவ்வொன்றாக தவாவில் போட்டு மூடவேண்டும்.
இரண்டு நிமிடம் கழித்து மேலே உப்பி வரும்.வெளியே எடுத்து இருபுறமும் வெண்ணைய் தடவவேண்டும்.

இதற்கு side dish Peas Masala,ஆலூ மட்டர்.

ராகி (கேழ்வரகு) தோசை

2011-11-28T04:43:00.000-08:00

தேவையானவை:
ராகி

ராகி மாவு2 கப்
அரிசி மாவு 1 கப்
தயிர் 3/4 கப்
பச்சை மிளகாய் 3
சீரகம் 1 தேக்கரண்டி
வெங்காயம் 2
கொத்தமல்லித்தழை சிறிதளவு
கறிவேப்பிலை சிறிதளவு
உப்பு,எண்ணைய் தேவையானது
------
தாளிக்க:
கடுகு 1 தேக்கரண்டி
மிளகாய் வற்றல் 2
பெருங்காய்த்தூள் 1 தேக்கரண்டி
------
செய்முறை:

ராகி மாவு கடைகளில் கிடைக்கும்.இல்லாவிடில் ராகியை வாங்கி காயவைத்து மெஷினில் அரைத்துக்கொள்ளலாம்.
தயிரை நன்கு கடைந்து ராகி மாவு,அரிசிமாவு,தேவையான தண்ணீர்,உப்பு சேர்த்து கரைத்துக்கொள்ளவும்.(ரவை தோசை மாவு பதம்)

கரைத்த மாவில் வெங்காயத்தை பொடியாக நறுக்கிப்போடவும்.
சீரகத்தை உள்ளங்கையில் தேய்த்து போடவும்.
பச்சைமிளகாய்,கொத்தமல்லித்தழை,கறிவேப்பிலை மூன்றையும் பொடியாக நறுக்கிப் போடவும்.
தாளிக்கக் கொடுத்துள்ளவைகளை தாளித்து சேர்க்கவும்.

அடுப்பில் தோசைகல்லை வைத்து காய்ந்ததும் மாவை கரண்டியால் எடுத்து சுற்றி ஊற்றவும்.
எண்ணையை சுற்றி ஊற்றி நன்கு வெந்ததும் எடுக்கவும்.

ராகி தோசைக்கு தக்காளி சட்னி,பச்சைமிளகாய் சட்னி சிறந்த side dish.

அரிசி கோதுமையை விட ஊட்ட சத்து நிறைந்தது ராகி.
புரதம்,சுண்ணாம்பு,இரும்புச்சத்து.நார்ச்சத்து எல்லாம் நிறைந்தது.

கோவைக்காய் மசாலா

2011-11-21T21:43:00.000-08:00

..
தேவையானவை:
கோவைக்காய் 1/4 கிலோ
மஞ்சள் தூள் 1/2 தேக்கரண்டி
புளி சிறிதளவு
உப்பு,எண்ணெய் தேவையானது
----
அரைக்க:
சின்ன வெங்காயம் 5
மிளகாய் வற்றல் 2
பூண்டு 2 பல்
தேங்காய் துருவல் 1 மேசைக்கரண்டி
உளுத்தம்பருப்பு 1 தேக்கரண்டி
சீரகம் 1 தேக்கரண்டி
-----
தாளிக்க:
கடுகு 1 தேக்கரண்டி
உளுத்தம்பருப்பு 1 தேக்கரண்டி
கறிவேபிலைசிறிதளவு
-----
செய்முறை:

கோவக்காயை நீட்ட வாக்கில் நறுக்கிக்கொள்ளவேண்டும்.
ஒரு microwave bowl ஐ எடுத்துக்கொண்டு அதில் கோவக்காயுடன் சிறிது தண்ணீர் தெளித்து மஞ்சள் தூள்சேர்த்து மொத்தம் 12 நிமிடம் வைக்கவேண்டும்.
நான்கு,நான்கு நிமிடங்களாக வைக்கவேண்டும்.மூன்றாவது தடவை வைக்கும் போது தேவையான உப்பு சேர்த்து வைக்கவேண்டும்.நன்கு வெந்துவிடும்.
அரைக்கக் கொடுத்துள்ள பொருட்களை எண்ணையில் வதக்கி விழுது போல அரைத்துக்கொள்ளவேண்டும்.
-------
அடுப்பில் கடாயை வைத்து தாளிக்க வேண்டியவைகளை தாளித்து கோவக்காயை சேர்த்து வதக்கவேண்டும்.
புளியை கெட்டியாக கரைத்து ஊற்றி அரைத்த விழுதையும் சேர்த்து கொதிக்கவைக்கவேண்டும்.தண்ணீர் அதிகம் சேர்க்கவேண்டாம்.
எல்லாம் சேர்ந்து கொதித்தவுடன் இறக்கவேண்டும்.
-- கோவைக்காய் மசாலா சப்பாத்தி,பூரிக்கு ஏற்ற side dish. சாதத்தோடும் சேர்த்து பிசைந்து சாப்பிடலாம்.

முடக்கத்தான் கீரை மசியல்

2011-11-18T00:20:00.000-08:00

முடக்கத்தான் கீரை

தேவையானவை:

முடக்கத்தான் கீரை 2 கப்

பயத்தம்பருப்பு 1/4 கப்

சின்ன வெங்காயம் 5

கடலை மாவு 1 தேக்கரண்டி

உப்பு,எண்ணைய் தேவையானது

--------

அரைக்க:

தேங்காய் துருவல் 1/4 கப்

சீரகம் 1 தேக்கரண்டி

பச்சைமிளகாய் 2

-------

தாளிக்க:

கடுகு 1 தேக்கரண்டி

உளுத்தம்பருப்பு 1 தேக்கரண்டி

மிளகாய் வற்றல் 2

------

செய்முறை:

முடக்கத்தான் கீரையை நன்கு அரிந்து அலசிக்கொள்ளவும்.

ஒரு குக்கரை எடுத்துக்கொண்டு அதில் முதலில் பயத்தம்பருப்பை அரை கப் தண்ணீருடன் சேர்த்து அதன் மேல் அரிந்த முடக்கத்தான் கீரையை தேவையான உப்புடன் சேர்க்கவும்.

மூன்று விசில் வந்ததும் அடுப்பை அணைக்கவும்.

ஒரு வாணலியை அடுப்பில் வைத்து சிறிது எண்ணெய் சேர்த்து வெங்காயத்தை பொன்னிறமாக வதக்கவும்.

குக்கரில் இருந்து எடுத்த கீரையை இதனுடன் சேர்த்து கொதிக்கவிடவும்.

அரைக்கக் கொடுத்துள்ளவைகளை விழுது போல் அரைத்து கீரையுடன் சேர்க்கவும்.

கடலை மாவை சிறிது தண்ணீருடன் கரைத்து சேர்த்து சிறிது கொதிக்கவிடவும்.

கடைசியில் கடுகு,உளுத்தம்பருப்பு,மிளகாய் வற்றல் தாளிக்கவும்.

முடக்கத்தான் கீரை மூட்டு வலிக்கு சிறந்தது.

குடமிளகாய்..வெங்காயம்..பொரியல்

2011-11-13T21:45:00.000-08:00

தேவையானவை:
பச்சை குடமிளகாய் 1
சிவப்பு குடமிளகாய் 1
மஞ்சள் குடமிளகாய் 1
வெங்காயம் 2
மஞ்சள் தூள் 1/2 தேக்கரண்டி
பயத்தம் பருப்பு 1 மேசைக்கரண்டி
------
அரைக்க:
தேங்காய் துருவல் 1 மேசைக்கரண்டி
பச்சை மிளகாய் 2
பொட்டுக்கடலை 1 மேசைக்க்கரண்டி
------
தாளிக்க:
கடுகு 1 தேக்கரண்டி
உளுத்தம்பருப்பு1 தேக்கரண்டி
கறிவேப்பிலை சிறிதளவு.
--------
செய்முறை:

மூன்று பச்சைமிளகாய்களையும்,வெங்காயத்தையும் பொடியாக நறுக்கிக்கொள்ளவும்.
பயத்தம்பருப்பை பத்து நிமிடம் தண்ணீரில் ஊறவைக்கவும்.
அரைக்கக் கொடுத்துள்ளவைகளை தண்ணீர் விடாமல் அரைத்துக்கொள்ளவும்.

அடுப்பில் கடாயை வைத்து எண்ணைய் சேர்த்து தாளிக்க வேண்டியவைகளை தாளித்து வெங்காயத்தை பொன்னிறமாக வதக்கவும்.
ஊறவைத்துள்ள பயத்தம்பருப்பை வடிகட்டி இதனுடன் சேர்த்து பிரட்டவும்..
பின்னர் நறுக்கி வைத்துள்ள மூன்று குடமிளகாய்களையும் தேவையான உப்பு,மஞ்சள் தூள் சேர்த்து வதக்கவும்.
குடமிளகாய் எல்லாம் நன்கு வெந்ததும் அரைத்து வைத்துள்ள தேங்காய்,பொட்டுக்கடலை பொடியை தூவி கிளற சுவையான குடமிளகாய்..வெங்காயம்...பொரியல் ரெடி.
பார்க்க கலர்ஃபுல்லாக இருப்பதால் குழந்தைகள் விரும்பி சாப்பிடுவார்கள்.

கறிவேப்பிலை பொடி

2011-11-10T22:32:00.000-08:00

தேவையானவை:
கறிவேப்பிலை 1 கப் (ஆய்ந்தது)
மிளகாய்வற்றல் 4
உளுத்தம்பருப்பு 1 மேசைக்கரண்டி
கடலைபருப்பு 1 மேசைக்கரண்டி
பெருங்காயம் 1 துண்டு
புளி சி றி தளவு
உப்பு,எண்ணைய் தேவையானது

செய்முறை:
அடுப்பில் வாணலியை வைத்து ஆய்ந்து வைத்துள்ள கறிவேப்பிலையை போட்டு எண்ணைய் விடாமல் ஒரு பிரட்ட வேண்டும்.
ஈரமெல்லாம் போனவுடன் தனியே எடுத்து வைக்கவேண்டும்.
வாணலியில் சிறிது எண்ணைய் வைத்து மிளகாய் வற்றலை தனியே வறுத்து எடுக்கவேண்டும்.
அதே வாணலியில் கடலை பருப்பு,உளுத்தம்பருப்பு இரண்டையும் பொன்னிறமாக வறுக்கவேண்டும்.
பெருங்காயத்தை தனியே பொரித்து எடுக்கவேண்டும்
கடைசியில் புளியையும் உப்பையும் ஒரு பிரட்டு பிரட்ட வேண்டும்.

மிக்சியில் முதலில் பருப்புகளையும்,மிளகாய்வற்றல், பெருங்காயம் புளி உப்பு சேர்த்து ஒரு சுற்று சுற்றி விட்டு கறிவேப்பிலையை சேர்த்து
பொடியாக அரைக்கவேண்டும்.
கறிவேப்பிலை பொடியை சாதத்தோடு சிறிது நல்லெண்ணைய் சேர்த்து சாப்பிடலாம்.
தயிர் சாதத்திற்கு ஊறுகாய்க்கு பதில் தொட்டுக்கொள்ளலாம்.

பாலக்....காராமணி....STEW.

2011-11-07T19:07:00.000-08:00

தேவையானவை:
காராமணி 1/2 கப்
பாலக்கீரை 1/2 கப் (பொடியாக நறுக்கியது)
பட்டை 1 துண்டு
சீரகம் 1 தேக்கரண்டி
மிளகுதூள் 1 தேக்கரண்டி
வெங்காயம் 1
தக்காளி 1
தேங்காய் பால் 1/2 கப்
வெங்காயம் 1
தக்காளி 1
உலர்ந்த திராட்சை 5
உப்பு,எண்ணைய் தேவையானது
--------
அரைக்க:
பூண்டு 4 பற்கள்

குங்குமப்பூ 1/2 தேக்கரண்டி

------
செய்முறை:
காராமணியை ஒரு மணி நேரம் தண்ணீரில் ஊறவைத்து வேகவைத்துக் கொள்ளவும்.
பாலக் கீரையை பொடியாக நறுக்கி சிறிது தண்ணீர் தெளித்து Microwave 'H'" ல் இரண்டு நிமிடம் வைத்து எடுத்து வைக்கவும்.
அரைக்கக்கொடுத்துள்ள பூண்டு,குங்குமப்பூ இரண்டையும் சிறிது உப்பு சேர்த்து அரைத்துக்கொள்ளவும்.
வெங்காயம்,தக்காளி இரண்டையும் பொடியாக நறுக்கி எண்ணையில் வதக்கி விழுது போல அரைத்துக்கொள்ளவும்.
-----------
ஒரு கடாயை அடுப்பில் வைத்து பட்டை, சீரகம்,மிளகுதூள் வதக்கி காராமணி,பாலக்கீரை.பூண்டு குங்குமப்பூ விழுது,வெங்காயம் தக்காளி விழுது,சிறிது உப்பு எல்லாவற்றையும் சிறிது தண்ணீர் சேர்த்து கொதிக்கவிடவும்.திராட்சையை சேர்க்கவும். பின்னர் தேங்காய் பால் சேர்த்து சிறிது கொதித்தவுடன் இறக்கவும்.

கண்டத்திப்பிலி ரசம்

2011-10-31T09:49:00.000-07:00

கண்டத்திப்பிலி

தேவையானவை:
கண்டத்திப்பிலி3
அரிசிதிப்பிலி 1
மிளகாய் வற்றல் 2
தனியா 1 தேக்கரண்டி
மிளகு 5
கடலைப்பருப்பு 1/2 தேக்கரண்டி
சீரகம் 1 தேக்கரண்டி
புளி எலுமிச்சை அளவு
பூண்டு 4 பற்கள்
நெய் 1 தேக்கரண்டி
---------
தாளிக்க:
கடுகு 1 தேக்கரண்டி
கறிவேப்பிலை சிறிதளவு
-------
செய்முறை:

கண்டத்திப்பிலி,அரிசிதிப்பிலி,மிளகாய் வற்றல்.தனியா,மிளகு,கடலைப்பருப்பு எல்லாவற்றையும் வறுத்து சிறிது தண்ணீர் சேர்த்து விழுது போல அரைத்துக்கொள்ளவும்.
சீரகத்தை சிறிது தண்ணீர் சேர்த்து பச்சையாக அரைத்துக்கொள்ளவும்.
ஒரு பாத்திரத்தை எடுத்துக்கொண்டு அதில் புளியை இரண்டு கப் தண்ணீரில் கரைத்து விடவும்.
அதனுடன் அரைத்து வைத்துள்ள கண்டத்திப்பிலி விழுது,சீரக விழுது தேவையான உப்பு சேர்த்து கொதிக்க விடவும்.
பூண்டு பற்களை நெய்யில் வறுத்து சேர்க்கவும்.
ரசம் நன்கு கொதித்தவுடன் கடுகு கறிவேப்பிலை தாளிக்கவும்.
இந்த ரசம் உடல் வலியை போக்கும்.

ரிப்பன் தேன்குழல்

2011-10-23T05:04:00.000-07:00

தேவையானவை:

கடலைமாவு 2 கப்
அரிசிமாவு 1 கப்
காரப்பொடி 1 மேசைக்கரண்டி
மிளகுத்தூள் 1 தேக்கரண்டி
பெருங்காயம் 1 தேக்கரண்டி
வெண்ணைய் 1/4 கப்

உப்பு,எண்ணைய் தேவையானது

செய்முறை:

ஒரு அகண்ட பாத்திரத்தை எடுத்துக்கொண்டு அதில் கடலைமாவு,அரிசிமாவு இரண்டையும் சேர்த்து கலக்கவேண்டும்.
உப்பையும் பெருங்காயத்தையும் சிறிது தண்ணீரில் கரைத்து மாவில் விடவேண்டும்.
அதனுடன் காரப்பொடி,மிளகு தூள்,வெண்ணைய் எல்லாவற்றையும் தேவையான தண்ணீருடன் சேர்த்து கெட்டியாக பிசையவேண்டும்.

வாணலியில் எண்ணைய் வைத்து காய்ந்த பின் தேன்குழல் படியில் நாடா வில்லையைப்போட்டு,சிறிது மாவை அதில் சேர்த்து எண்ணையில் பிழியவும்.
இரண்டு பக்கமும் நன்றாக வெந்ததும் எடுக்கவும்.

பாதாம் அல்வா

2011-10-21T22:56:00.000-07:00

தேவையானவை:

பாதாம் பருப்பு 1 கப் (அரைத்த விழுது)

சர்க்கரை1 1/2 கப்
நெய் 1 கப்
குங்குமப்பூ சிறிது (optional)
ஏலக்காய் தூள் 1/2 டீஸ்பூன்
Lemon yellow colour 1/2 டீஸ்பூன்

செய்முறை:

பாதாம் பருப்புகளை கொதிக்கும் நீரில் போட்டு அரைமணிநேரம் மூடிவைக்கவேண்டும்.பின்னர் அதனை எடுத்து தோலுரித்து சிறிது தண்ணீருடன் மிக்ஸியில் சற்று கரகரப்பாக அரைத்து எடுக்கவும்.

அடுப்பில் சற்று அடி கனமான பாத்திரத்தை வைத்து பாதாம் விழுதுடன் சர்க்கரை சேர்த்து நன்கு கிளறவேண்டும்.உருட்டுகிற பதம் வருகிறவரை கிளறவேண்டும்.பின்னர் அடுப்பை அணைத்துவிட்டு பாதாம் பருப்பு விழுது,சர்க்கரை கலவையில் நெய் சேர்த்து கிளறவேண்டும்.(அடுப்பு எரியும்போதே நெய் ஊற்றி கிளறினால் அல்வாவின் நிறம் மாறிவிடும்)அல்வாவானது பாத்திரத்தில் ஒட்டாமல் வரும்.

அல்வாவில் ஏலப்பொடி,குங்குமப்பூ,lemon colour சேர்க்கவண்டும்

கர்நாடகா போண்டா

2011-10-20T06:12:00.000-07:00

தேவையானவை:
மைதாமாவு 2 கப்
கடலைமாவு 2 மேசைக்கரண்டி
அரிசிமாவு 2 மேசைக்கரண்டி
உளுந்து மாவு 1 மேசைக்கரண்டி
தயிர் 1 கப்
----------
பச்சைமிளகாய் 2
தேங்காய் 1 துண்டு
இஞ்சி 1 துண்டு
கறிவேப்பிலை சிறிதளவு
பெருங்காயத்தூள் 1 தேக்கரண்டி
உப்பு,எண்ணைய் தேவையானது
--------
செய்முறை:

மைதாமாவு,கடலைமாவு,அரிசிமாவு,உளுந்துமாவு நான்கினையும் தேவையான உப்பு சேர்த்து ஒன்றாகக்கலந்து தயிரை ஊற்றி பிசையவேண்டும்.
தேவைப்பட்டால் தண்ணீர் தெளித்துக்கொள்ளலாம்..
பச்சைமிளகாய்,இஞ்சி,தேங்காய் மூன்றையும் சிறு சிறு துண்டுகளாக நறுக்கி மாவில் கலக்கவும் பொடியாக அரிந்த .கறிவேப்பிலை,பெருங்காயத்தூள் சேர்த்து
ஒரு மணி நேரம் ஊறவைக்கவேண்டும்.
வாணலியில் எண்ணைய் வைத்து மிதமான சூட்டில் மாவை சிறு சிறு உருண்டைகளாகப் பிடித்துப்போட்டு பொன்னிறமாக வந்ததும் எடுக்கவேண்டும்.

தேங்காய் சட்னி இதற்கு பொருத்தமான side dish..

பொன்னாங்கண்ணிக்கீரை மசியல்

2011-10-17T04:22:00.001-07:00

தேவையானவை:
பொன்னாங்கண்ணிக்கீரை அரிந்தது 2 கப்
துவரம்பருப்பு அல்லது
பயத்தம்பருப்பு 1/2 கப்
காராமணி பருப்பு 1 மேசைக்கரண்டி
முழுப்பயறு1 மேசைக்கரண்டி
flax seeds 1 தேக்கரண்டி
--------
இஞ்சி பூண்டு விழுது 1 தேக்கரண்டி
தனியா பவுடர் 1 தேக்கரண்டி
சீரகத்தூள் 1 தேக்கரண்டி
மிளகுத்தூள் 1 தேக்கரண்டி
வறுத்த தேங்காய் துருவல் 1 மேசைக்கரண்டி
--------
உப்பு,எண்ணைய் தேவையானது
-------
தாளிக்க:
கடுகு1 தேக்கரண்டி
உளுத்தம்பருப்பு 1 தேக்கரண்டி
பெருங்காயத்தூள் 1/2 தேக்கரண்டி
கறிவேப்பிலை சிறிதளவு
மிளகாய் வற்றல் 2
--------
செய்முறை:

ஒரு பாத்திரத்தை எடுத்துக்கொண்டு அதில் அரிந்தபொன்னாங்க்கண்ணிக்கீரை,பயத்தம்பருப்பு,காராமணி பருப்பு,flax seeds எல்லாவற்றையும் சிறிது உப்பு,தண்ணீருடன் (1/2 கப்)
சேர்த்து அப்படியே குக்கரில் மூன்று விசில் வரும்வரை வைக்கவும்.
ஒரு வாணலியை அடுப்பில் வைத்து தாளிக்க வேண்டியவைகளை தாளித்து குக்கரில் இருந்து எடுத்த கீரைக்கலவையை நன்றாக மத்தில் மசித்து சேர்க்கவும்.
அதனுடன் இஞ்சி பூண்டு விழுது,தனியா பவுடர்,சீரகத்தூள்,மிளகுத்தூள்,தேங்காய் துருவல் சேர்த்து நன்றாக கொதித்தவுடன் இறக்கவும்.

மசியல் தண்ணியாக இருந்தால் ஒரு தேக்கரண்டி கடலை மாவு அல்லது கார்ன் மாவு தண்ணீரில் கரைத்து சேர்த்து சிறிது நேரம் கழித்து இறக்கலாம்.

இந்தக்கீரை கண்ணுக்கு மிகவும் நல்லது.உடலுக்கு குளிர்ச்சியைத் தரும்.

புடலங்காய் உசிலி

2011-10-13T06:29:00.000-07:00

தேவையானவை:

புடலங்காய் 2 கப் (பொடியாக நறுக்கியது)
மஞ்சள்தூள் 1 தேக்கரண்டி
தேங்காய் துருவல் 1/2 கப்
துவரம்பருப்பு 1/2 கப்
கடலைப்பருப்பு 1/2 கப்

மிளகாய் வற்றல் 4

பெருங்காயம் 1 துண்டு

மஞ்சள்தூள் 1/2 டீஸ்பூன்

உப்பு,எண்ணைய் தேவையானது
---
தாளிக்க:

கடுகு,உளுத்தம்பருப்பு .கறிவேப்பிலை மூன்றும்சிறிதளவு

செய்முறை:

புடலங்காயை பொடியாக நறுக்கிக்கொண்டு உப்பு மஞ்சள்தூள் சேர்த்து பிசறி பத்து நிமிடம் ஊறவைக்கவும்.

துவரம்பருப்பு,கடலைபருப்பு,மிளகாய்வற்றல்,பெருங்காயம் நான்கையும் ஒரு மணிநேரம் தண்ணீரில்

ஊறவைத்து வடிகட்டி சிறிது உப்பு சேர்த்து நைசாக அரைக்கவும்.

அரைத்த விழுதை இட்லி தட்டில் வைத்து ஆவியில் 15 நிமிடம் வேகவைக்கவும்.

ஆவியில் வேகவைத்த பருப்புகளை நன்கு உதிர்க்கவும்.(மிக்சியில் ஒரு சுற்று சுற்றினால் உதிரியாக வரும்)

வாணலியில் எண்ணைய் வைத்து கடுகு,உளுத்தம்பருப்பு .கறிவேப்பிலை தாளித்து

ஊறவைத்த புடலங்காய் துண்டுகளை நன்றாக பிழிந்து எடுத்து சேர்த்து வதக்கவும்..
புடலங்காய் நன்கு வதங்கினவுடன் உதிர்த்த பருப்புகளை சேர்த்து சிறிது எண்ணைய் விட்டு நன்றாக கிளறவும்.
உதிரி உதிரியாக வரும்.கடைசியில் தேங்காய் துருவலை சிறிது வறுத்து சேர்க்கவேண்டும்.

காளன்

2011-10-09T23:12:00.000-07:00

தேவையானவை:
சேனைக்கிழங் கு 1 கப் (சிறு துண்டுகளாக நறுக்கியது)
துருவிய தேங்காய் 3/4 கப்
சீரகம் 1 தேக்கரண்டி
வெந்தயம் 1 தேக்கரண்டி
மஞ்சள்தூள் 1 தேக்கரண்டி
மிளகுதூள் 1 தேக்கரண்டி
நெய் 1 தேக்கரண்டி
தயிர் 1 கப்
உப்பு தேவையானது
------------
தாளிக்க:
தேங்காய் எண்ணைய் 1 மேசைக்கரண்டி
கடுகு1 தேக்கரண்டி
சிவப்பு மிளகாய் 2
பச்சைமிளகாய்2

கறிவேப்பிலை சிறிதளவு

--------
செய்முறை:
தேங்காய் துருவல் சீரகம் இரண்டையும் சிறிது தண்ணீர் தெளித்துவிழுது போல அரைத்துக்கொள்ளவும்.
வெந்தயத்தை வெறும் வாணலியில் வறுத்து விழுது போல அரைத்துக்கொள்ளவும்.
-----------
ஒரு பாத்திரத்தை எடுத்துக்கொண்டு அதில் அரை கப் தண்ணீர் விட்டு ஒரு தேக்கரண்டி மிளகு தூள் சேர்த்து இரண்டு நிமிடம் கொதிக்கவைக்கவேண்டும்.
பின்னர் வடிகட்டி அந்த தண்ணீரை மீண்டும் பாத்திரத்தில் வைத்து அதனுடன் நறுக்கிய சேனைக்கிழங்கு துண்டுகள் .மஞ்சள் தூள்,தேவையான உப்பு சேர்த்து கொதிக்கவிடவும்.
சேனைக்கிழங்கு சிறிது வெந்ததும் அரைத்து வைத்துள்ள தேங்காய் துருவல்,சீரக விழுதையும்,வெந்தய விழுதையும் நெய்யுடன் சேர்த்து சிறிது கொதிக்கவிடவும்.
பின்னர் தயிர் சேர்த்து ஒரு கிளறு கிளறி இறக்கவேண்டும்.(தயிர் சேர்த்த பின் கொதிக்கவைக்கக்கூடாது)
வாணலியில் தேங்காயெண்ணைய் வைத்து கடுகு,கிள்ளிய சிவப்பு மிளகாய்,குறுக்காக வெட்டிய பச்சைமிளகாய்,கறிவேப்பிலை தாளித்து சேர்க்கவும்.

கறுப்பு உளுந்து சுண்டல்

2011-10-03T00:40:00.000-07:00

தேவையானவை:
கறுப்பு உளுந்து 2 கப்

தேங்காய் துருவல் 1/2 கப்

இஞ்சி 1 துண்டு
பச்சைமிளகாய் 3
சீரகம் 1 தேக்கரண்டி
உப்பு,எண்ணைய் தேவையானது
-------
தாளிக்க:
கடுகு 1 தேக்கரண்டி
கறிவேப்பிலை சிறிதளவு
------
செய்முறை:
கறுப்பு உளுந்தை இரவே ஊறவைத்து மறு நாள் குக்கரில் வைத்து மூன்று விசில் வந்ததும் அடுப்பை அணைக்கவேண்டும்.
தேங்காய் துருவல்,இஞ்சி,பச்சைமிளகாய்,சீரகம் நான்கினையும் தண்ணீர் விடாமல் பொடி போல அரைத்துக்கொள்ளவேண்டும்.
--------
அடுப்பில் கடாயை வைத்து எண்ணைய் காய்ந்ததும் கடுகு கறிவேப்பிலை தாளித்து குக்கரில் இருந்து எடுத்த கறுப்பு உளுந்தை வடிகட்டி தேவையான உப்புடன்
சேர்க்கவேண்டும்.அதனுடன் அரைத்த பொடியையும் சேர்த்து நன்கு கிளறவேண்டும்.

கறுப்பு உளுந்து இடுப்புக்கு பலம் கொடுக்கும்.

வெள்ளரி விதை பாயசம்

2011-09-25T04:10:00.000-07:00

தேவையானவை:
வெள்ளரி விதை 1/2 கப்
பாதாம்பருப்பு 10
பால் 2 கப்
வெல்லம் பொடித்தது 1 கப்
முந்திரிபருப்பு 10
திராட்சை 10
குங்குமப்பூ ஒரு சிட்டிகை
ஏலப்பொடி 1/2 தேக்கரண்டி

நெய் 1 தேக்கரண்டி

செய்முறை:

வெள்ளரி விதையையும் பாதாம்பருப்பையும் ஒரு மணிநேரம் தண்ணீரில் ஊறவைத்து சிறிது பால் சேர்த்து விழுது போல அரைத்துக்கொள்ளவும்.
அதனுடன் ஒரு கப் தண்ணீர் சேர்த்து கொதிக்கவிடவும்.
நன்கு கொதித்தவுடன் பொடித்த வெல்லம் சேர்க்கவும்.
வெல்லம் கரைந்ததும் பாலை விட்டு கொதிக்கவிடவும்.
முந்திரியையும் திராட்சையையும் நெய்யில் வறுத்துப் போடவும்.
ஏலத்தூள் சேர்க்கவும்.
குங்குமப்பூவை பாலில் கலந்து சேர்க்கவும்.
வெள்ளரி விதை பாயசம் உடலுக்கு குளிர்ச்சியை தரக்கூடியது.

நவராத்திரியும் நைவேத்தியமும்

2011-09-19T20:32:00.000-07:00

நவராத்திரி புரட்டாசி மாசம் மாளய அமாவாசைக்கு அடுத்த நாள் தொடங்கி முதல் மூன்று நாட்கள் துர்க்கையையும் அடுத்த மூன்று நாட்கள் லட்சுமியையும் கடைசி மூன்று நாட்கள் சரஸ்வதியையும் பூஜிக்கும் வழக்கம் உண்டு.தேவியின் பெருமைகளை ஒன்பது நாட்களும் சொல்லி வழிபடுவார்கள்.ஒவ்வொரு நாளும் குறிப்பிட்ட நைவேத்தியம் செய்வார்கள்.ஒவ்வொரு கிழமைக்கும் ஒவ்வொரு நைவேத்தியம் விசேஷம்.அதைச்சொல்வதே இந்த பதிவு.
-----------
ஞாயிற்றுக்கிழமை: கோதுமை

கோதுமை அப்பம்:

ஒரு பாத்திரத்தில் சிறிது தண்ணீர் வைத்து 3/4 கப் பொடித்த வெல்லத்தை கரைத்துக்கொள்ளவும்.
அதில் கோதுமை மாவு 1 கப்,ரவை 1 மேசைக்கரண்டி,மைதா 1 மேசைக்கரண்டி சேர்த்து கரைக்கவும்.
ஏலப்பொடி,தேங்காய் துருவல் சேர்த்து நன்கு கரைத்து சிறு சிறு அப்பங்களாக எண்ணையில் பொரித்து எடுக்கவேண்டும்.
----------------------------
திங்கட்கிழமை: பாசிப்பயறு (பயத்தம்பருப்பு)

பாசிப்பயறு சுண்டல்:

ஒரு கப் பாசிப்பயற்றை கொஞ்சம் தண்ணீர் விட்டு வேகவைக்கவேண்டும்.நன்றாக வெந்ததும் வடிகட்டவேண்டும்.
வாணலியில் ஒரு மேசைக்கரண்டி எண்ணைய் வைத்து கடுகு பெருங்காயத்தூள் தாளித்து வடிகட்டிய பாசிப்பயற்றை தேவையான உப்புடன் சேர்த்து கிளறவேண்டும்.
கடைசியில் தேங்காய் துருவல்,இஞ்சி துருவல்,கறிவேப்பிலை சேர்த்து இறக்கவேண்டும்.
----------------------------
செவ்வாய் கிழமை: துவரம்பருப்பு:

துவரம்பருப்பு குணுக்கு:

துவரம்பருப்பு 1 கப்,கடலைபருப்பு 1/4 கப்,உளுத்தம்பருப்பு 1/4 கப்,புழுங்கலரிசி 1 மேசைக்கரண்டி .மிளகாய் வற்றல் 4, இவற்றை 2 மணிநேரம் ஊறவைக்கவேண்டும்.
இதனுடன் தேவையான உப்பு,சிறிது பெருங்காயம் சேர்த்து அரைக்கவேண்டும்.அரைத்த மாவில் கொத்தமல்லித்தழையை பொடியாக நறுக்கி கலந்து கறிவேப்பிலை சேர்த்து
சிறு சிறு உருண்டைகளாக உருட்டி எண்ணையில் பொரித்து எடுக்கவேண்டும்.
-----------------------

புதன் கிழமை: காராமணி

காராமணி சுண்டல்

ஒரு கப் காராமணியை மூன்று மணி நேரம் ஊறவைத்து ஒரு தேக்கரண்டி சர்க்கரை,சிறிது உப்பு சேர்த்து வேகவைக்கவேண்டும்.
பின்னர் வடிகட்டி வாணலியில் எண்ணைய் வைத்து கடுகு,கறிவேப்பிலை,பெருங்காயத்தூள் தாளித்து வடிகட்டிய காராமணியை சேர்த்து வதக்கவேண்டும்.
சீரகம்,மிளகு,தனியா ஒவ்வொன்றும் ஒரு தேக்கரண்டி எடுத்து வறுத்து பொடி பண்ணி சேர்க்கவேண்டும்.
கடைசியில் தேங்காய் துருவல் சேர்க்கவும்.
-------------------------
வியாழக்கிழமை: கொண்டக்கடலை :

கொண்டக்கடலை சுண்டல்:

ஒரு கப் கொண்டக்கடலையை முதல் நாள் இரவே ஊறவைக்கவேண்டும்.
மறு நாள் குக்கரில் உப்பு சேர்த்து இரண்டு விசில் வரும் வரை வைக்கவும்.
வாணலியில் எண்ணைய் வைத்து கடுகு,கறிவேப்பிலை,பெருங்காயத்தூள்,இரண்டு வற்றல் மிளகாய் தாளித்து வடிகட்டிய கொண்டக்கடலையை சேர்த்து வதக்கவும்.
தேங்காயை சிறு சிறு துண்டங்களாக நறுக்கி சேர்க்கலாம்.
வேண்டுமென்றால் இஞ்சியைத் துருவி போடலாம்.
-------------------------
வெள்ளிக்கிழமை: புட்டு:

பச்சரிசியை மிஷினில் நைசாக மாவாக அரைத்துக்கொள்ளவேண்டும்.வாணலியில் இந்த மாவை எண்ணைய் விடாமல் சிவப்பாக வறுத்துக்கொள்ளவேண்டும்.
ஆறிய பின் மாவை சலித்து ஒரு பெரிய தட்டில் கொட்டி மிதமான வென்னீர் விட்டு பிசையவேண்டும். (உதிர்த்தால் உதிராக இருக்கும்படி பிசையவேண்டும்)
இந்த மாவை இட்லி தட்டில் ஆவியில் 15 நிமிடங்கள் வைத்து எடுக்கவேண்டும்.
ஒரு அகண்ட பாத்திரத்தில் தண்ணீர் சிறிது விட்டு (ஒரு கப் மாவிற்கு ஒரு கப் பொடித்த வெல்லம்) துருவிய வெல்லம் சேர்த்து உருண்டைப்பாகு வந்தவுடன்
ஆவியில் வைத்த மாவை சேர்த்து கிளறவும்.
வாணலியில் 1/4 கப் நெய் வைத்து காய்ந்ததும் புட்டு மாவுடன் ஏலப்பொடி சேர்த்து ஒரு கிளறு கிளற வேண்டும்.
தேங்காயை சிறு சிறு துண்டுகளாக நறுக்கிப் போடவும்.
முந்திரிபருப்பை வறுத்துப் போடவும்.
---------------------
சனிக்கிழமை: எள்

எள் பர்ஃபி:
எள்ளை நீர் விட்டு நன்றாக களைந்துவிட்டு வடிகட்டி வெறும் வாணலியில் போட்டு வெடிக்கும் வரை வறுக்கவேண்டும்.
வறுத்த எள் ஒரு கப், வறுத்த வேர்க்கடலை ஒரு கப் இரண்டையும் 'நற நற' என்று பொடி பண்ண வேண்டும்.
வாணலியில் சிறிது தண்ணீர் வைத்து (ஒரு கப் பொடி பண்ணிய கலவைக்கு ஒரு கப் பொடித்த வெல்லம்) பொடித்த வெல்லம் ஏலத்தூள் சேர்த்து
கம்பிப்பாகு வந்ததும் பொடி பண்ணியதைப் போட்டு நன்கு கிளறி ஒரு தட்டில் நெய்யை பரவலாகத் தடவி கிளறியதைக் கொட்டி வில்லைகளாக போடலாம்.

உருளைக்கிழங்கு பொடிமாஸ்

2011-09-11T21:29:00.000-07:00

தேவையானவை:
உருளைக்கிழங்கு 5
வெங்காயம் 2
தேங்காய் துருவல் 1/4 கப்
பச்சைமிளகாய் 2
இஞ்சி 1 துண்டு
தேங்காய் எண்ணைய் 1 தேக்கரண்டி
மஞ்சள்தூள் 1 தேக்கரண்டி
மிளகாய்தூள் 1 தேக்கரண்டி
எலுமிச்ச ஜூஸ் 1 தேக்கரண்டி
உப்பு,எண்ணைய் தேவையானது
-----
தாளிக்க:
கடுகு 1 தேக்கரண்டி
கடலைப்பருப்பு 1 தேக்கரண்டி
கறிவேப்பிலை ஒரு கொத்து
---
செய்முறை:
உருளைக்கிழங்கை வேகவைத்து தோலுரித்து மசித்துக்கொள்ளவும்.(உருளையை வேகவைக்கும்பொழுது இஞ்சித்துண்டை அதனுடன் சேர்த்து வேகவைக்கவும்.வாயு தொந்தரவு இருக்காது)
வெங்காயம்,பச்சைமிளகாய் இரண்டையும் பொடியாக நறுக்கிக்கொள்ளவும்.
தேங்காய் துருவலை தேங்காயெண்ணையில் வறுத்துக்கொள்ளவும்.
-----
அடுப்பில் வாணலியை வைத்து தாளிக்க வேண்டியவைகளை தாளித்து வெங்காயம்,பச்சைமிளகாய் இரண்டையும் வதக்கவும்.
பின்னர் மசித்த உருளைக்கிழங்கை சேர்க்கவும்.அதனுடன் உப்பு,மஞ்சள்தூள்,மிளகாய் தூள்,தேங்காய் துருவல் சேர்த்து கிளறவும்.
இறக்கிய பின் எலுமிச்சை ஜூஸ் பிழியவும்.
இந்த பொடிமாசை சாதத்தோடு சற்று நல்லெண்ணைய் விட்டு பிசைந்தும் சாப்பிடலாம். பொரியலாகவும் உபயோகித்துக்கொள்ளலாம்.
இதே முறையில் வாழைக்காயை செய்யலாம்

பலாப்பழ பாயசம்

2011-09-05T08:22:00.000-07:00

தேவையானவை:

பலாச்சொளை 10
பொடித்த வெல்லம் 1 1/2 கப்
பால் 1 கப்
முந்திரிபருப்பு 5
திராட்சை 5
நெய் 1 மேசைக்கரண்டி
குங்குமப்பூ 1/2 தேக்கரண்டி
-------
செய்முறை:

பலாச்சொளைகளின் உள்ளே இருக்கும் கொட்டைகளை எடுத்துவிட்டு குக்கரில் வேகவைத்து விழுது போல் அரைத்துக்கொள்ளவேண்டும்.
அரைத்த விழுதினை பொடித்த வெல்லத்துடன் சேர்த்து அடுப்பில் வைத்து வெல்லம் கரையும் வரை நன்கு கிளறவேண்டும்.
பின்னர் பாலை விட்டு எல்லாம் சேர்ந்து ஒரு கொதி வந்ததும் இறக்கவேண்டும்.
ஏலக்காய் சேர்த்து நெய்யில் முந்திரி திராட்சை வறுத்து போடவேண்டும்.
கடைசியாக குங்குமப்பூவை சிறிது பாலில் கலந்து சேர்க்கவேண்டும்.

கொழுக்கட்டை

2011-08-28T08:24:00.000-07:00

விநாயக சதூர்த்திக்கு தேங்காய்,உளுந்து ஆகிய இரண்டு வகை கொழுக்கட்டைகள் செய்வது வழக்கம்.

இதற்கு மேல்மாவு இரண்டிற்கும் ஒன்று.

மேல்மாவு செய்வதற்கு தேவையானவை:

அரிசி மாவு 2 கப்
(பச்சரிசி 3 கப்பை தண்ணீரில் இரண்டு மணிநேரம் ஊறவைத்து வடிகட்டி நிழலில் துணியை போட்டு உலர்த்தி எடுக்கவும்.
பின்னர் mixie ல் அரைத்து சலிக்கவும். )சலித்தமாவு 2 கப் இருக்கவேண்டும்.
தண்ணீர் 4 கப்
நல்லெண்ணைய் 2 டேபிள்ஸ்பூன்
உப்பு 1/2 டீஸ்பூன்

செய்முறை:
* அடுப்பில் ஒரு அகண்ட பாத்திரத்தை வைத்து அதில் 4 கப் தண்ணீர் விட்டு அதனுடன் எண்ணைய்,உப்பு சேர்த்து கொதிக்கவிடவும்.
நன்றாக கொதித்தவுடன் சலித்துவைத்துள்ள அரிசிமாவை பரவலாக தூவிக்கொண்டே கிளறவேண்டும்.கட்டிதட்டாமல் நன்றாக கிளறி
ஒரு தட்டில் எடுத்து வைத்து அதன் மேல் ஈரத்துணியால் மூடவேண்டும்.இப்போழுது மேல்மாவு ரெடி.

தேங்காய் பூரணம் செய்வதற்கு தேவையானவை:

துருவிய தேங்காய் 1 கப்
துருவிய வெல்லம் 1 கப்
நல்லெண்ணைய் 2 டேபிள்ஸ்பூன்
ஏலக்காய் பொடி 1 டீஸ்பூன்

செய்முறை:
1.அடுப்பில் வாணலியை வைத்து அதில் துருவிய தேங்காய்,வெல்லம் சேர்த்து கிளறவேண்டும்.
(தண்ணீர் விடக்கூடாது)ஈரப்பசை இல்லாமல் "பிசுக்" எனக்கையில் ஒட்டிக்கொள்ளும் பதத்தில் இறக்கி
ஏலக்காய் பொடியை தூவவேண்டும். தேங்காய் பூரணம் ரெடி.
2. ரெடியாக வைத்துள்ள மேல்மாவை நல்லெண்ணையை கையில் தடவிக்கொண்டு பிசைந்து உருண்டைகளாக
உருட்டிக்கொள்ளவும்.
3.ஒரு உருண்டையை கையில் எடுத்து கிண்ணம் போல் செய்து நடுவில் தேங்காய் பூரணத்தை வைத்து மூடவும்.
பின்னர் இட்லி தட்டில் ஆவியில் வைத்து 7 நிமிடத்தில் எடுக்கவும்.

உளுத்தம்பூரணம் செய்வதற்கு தேவையானவை:

உளுத்தம்பருப்பு 1/2 கப்
தேங்காய் துருவல் 1/2 கப்
கடலைப்பருப்பு 1 டேபிள்ஸ்பூன்
பச்சைமிளகாய் 2
சிவப்பு மிளகாய் 2
பெருங்காயத்தூள் 1 டீஸ்பூன்

தாளிக்க:
கடுகு 1 டீஸ்பூன்
உளுத்தம்பருப்பு 1 டீஸ்பூன்
கறிவேப்பிலை சிறிதளவு

செய்முறை:

1.இரண்டு பருப்புகளையும் ஒரு மணி நேரம் ஊறவைத்து வடிகட்டி மற்றவைகளுடன் சேர்த்து நைசாக
அரைத்துக்கொள்ளவும்.
2.அரைத்த விழுதை இட்லி தட்டில் ஆவியில் வைத்து 10 நிமிடம் கழித்து எடுக்கவும்.
3.ஆவியில் வைத்ததை எடுத்து உதிர்த்துக்கொண்டு வாணலியில் தாளிக்கவேண்டியவைகளை தாளித்து
அதனுடன் சேர்த்து கிளறி எடுத்து வைக்கவும்.
4.ரெடியாக வைத்துள்ள மேல்மாவினை உருண்டைகளாக்கி ஒரு உருண்டையை உள்ளங்கையில் வைத்து
பட்டையாக தட்டி அதனுள் உளுந்து பூரணத்தை வைத்து சோமாசி போல் மூடவும்.

பின்னர் இட்லிதட்டில் 7 நிமிடம் வைத்து எடுக்கவும்.

முள்ளங்கி பொரியல்

2011-08-21T20:23:00.000-07:00

தேவையானவை:
முள்ளங்கி 10
மஞ்சள்தூள் 1 தேக்கரண்டி
தேங்காய் துருவல் 2 மேசைக்கரண்டி
பொட்டுக்கடலை 1 மேசைக்கரண்டி
இஞ்சி 1 துண்டு
பச்சைமிளகாய் 2
உப்பு,எண்ணைய் தேவையானது
------
கடுகு 1 தேக்கரண்டி
உளுத்தம்பருப்பு 1 தேக்கரண்டி
கறிவேப்பிலை 1 கொத்து
-----
செய்முறை:

முள்ளங்கியை பொடியாக நறுக்கிக்கொள்ளவும்.
ஒரு microwave bowl ல் நறுக்கிய முள்ளங்கியை சிறிது தண்ணீரும்,மஞ்சள்தூளும் சேர்த்து "H" ல் நான்கு நிமிடம் வைக்கவும்.
வெளியே எடுத்து தேவையான உப்பு சேர்த்து ஒரு கிளறு கிளறி மீண்டும் நான்கு நிமிடம் வைக்கவும். வெந்துவிடும்.
வாணலியில் எண்ணைய் சேர்த்து கடுகு,உளுத்தம்பருப்பு,கறிவேப்பிலை தாளித்து வேகவைத்த முள்ளங்கியை சேர்த்து பிரட்டவும்.
தேங்காய் துருவல் ,பொட்டுக்கடலை .இஞ்சி.பச்சைமிளகாய் நான்கையும் கரகரவென்று அரைத்து சேர்க்கவும்.
திடீரென்று விருந்தாளிகள் வந்தால் இந்த பொரியலை பதினைந்து நிமிடத்தில் செய்து அசத்திவிடலாம்.

வெஜ் சைனீஸ் மஞ்சூரியன்

2011-08-15T04:41:00.000-07:00

தேவையானவை:
பீன்ஸ் 1/4 கப் (பொடியாக நறுக்கியது)
முட்டைக்கோஸ் 1/4 கப் (பொடியாக நறுக்கியது)
குடமிளகாய் 1/4 கப் (பொடியாக நறுக்கியது)
காலிஃப்ளவர் 10 பூக்கள்
சிலரி சிறிதளவு
வெங்காயம் 1/2 கப் (நறுக்கியது)
spring onion 1/2 கப் (நறுக்கியது)
-------
பூண்டு 8 பல்
இஞ்சி 1 துண்டு
பச்சைமிளகாய் 4
சோயா sauce 2 மேசைகரண்டி
சில்லி பேஸ்ட் 2 மேசைக்கரண்டி
மிளகு தூள் 1 தேக்கரண்டி
கார்ன் மாவு 2 மேசைக்கரண்டி
vegetable stock 1/2 கப்
------செய்முறை:மஞ்சூரியன் செய்யும் முறை:

காய்கறிகளை ஒரே அளவில் நறுக்கிகொள்ளவும்.
கடாயில் சிறிது தண்ணீர் வைத்து எல்லா காய்கறிகளையும் வேகவைக்கவும்.
ஒரு மஸ்லீன் துணியில் காய்கறிகளை வடிகட்டவும்.
வடிந்த தண்ணீரை veg.stock ஆக பயன்படுத்தலாம்.
-------
வாணலியில் எண்ணைய் வைத்து பூண்டு,இஞ்சி,பச்சைமிளகாய்,சோயா sauce,சில்லி
பேஸ்ட்,மிளகு தூள்,கார்ன் மாவு எல்லாவற்றிலும் பாதி அளவு எடுத்து இதில்
சேர்த்து நன்கு வதக்கவும்.காய்கறிகளையும் (வெங்காயம் தவிர்த்து) இதனுடன்
சேர்த்து வதக்கவும்.உப்பு சேர்க்கவும்.ஆறினவுடன் சிறு சிறு உருண்டைகளாக
உருட்டி எண்ணையில் பொறித்து எடுக்கவும்.

GRAVY செய்யும் முறை

கடாயில் எண்ணைய் வைத்து பொடியாக நறுக்கிய வெங்காயம் மீதமுள்ள
பூண்டு,இஞ்சி,பச்சைமிளகாய்,மிளகு தூள்,சில்லி பேஸ்ட்,சோயா sauce சேர்த்து
வதக்கவும்.சிறிது உப்பு சேர்க்கவும்.
ஒரு பாத்திரத்தை எடுத்துக்கொண்டு அதில் ஒரு மேசைக்கரண்டி கார்ன் மாவை ஒரு
கப் தண்ணீரில் கரைக்கவும்.சிறிது கொதிக்கவைக்கவும்.இந்த கரைசலை
கடாயில் உள்ள வெங்காயம்,பூண்டு மிக்சரில் சேர்க்கவும்.தயாராக உள்ள
பொறித்த மஞ்சூரியன் உருண்டைகளை சேர்த்து சிறிது நேரம் கொதிக்கவைத்து
இறக்கவும்.
நூடுல்ஸ்,சாதம் இரண்டோடும் சேர்த்து சாப்பிட சுவையாக இருக்கும்.

அரைப்புளி குழம்பு

2011-08-08T03:47:00.000-07:00

தேவையானவை:

சேனைக்கிழங்கு 1/4 கிலோ

கொண்டக்கடலை 1 கப் (channa)
புளி ஒரு எலுமிச்சை அளவு
சாம்பார் பொடி 3 மேசைக்கரண்டி
தேங்காய் துண்டுகள் 1/4 கப்
அரிசிமாவு 1 டீஸ்பூன்
எண்ணைய், உப்பு தேவையானது
------
தாளிக்க:
கடுகு 1 டீஸ்பூன்
உளுத்தம்பருப்பு 1 டீஸ்பூன்
பெருங்காயம் 1 துண்டு
மிளகாய் வற்றல் 3

கறிவேப்பிலை 1 கொத்து

-----
செய்முறை:

சன்னாவை நான்கு மணிநேரம் ஊறவைக்கவேண்டும்.
சேனைக்கிழங்கை தோல் சீவிவிட்டு சிறுசிறு துண்டுகளாக நறுக்கிக்கொள்ளவும்.
அடுப்பில் கனமான பாத்திரத்தை வைத்து அதில் ஒரு குழிக்கரண்டி நல்லெண்ணைய் ஊற்றி காய்ந்ததும் கடுகு,உளுத்தம்பருப்பு,பெருங்காயம்,மிளகாய் வற்றல்,
இவைகளுடன் கொண்டக்கடலையையும் போட்டு சிவக்க வறுக்கவும்.பின்னர் தேங்காய் துண்டங்களையும் போட்டு சற்று வறுத்து கறிவேப்பிலையை சேர்த்து
வெடிக்கவிடவும்.வெடித்ததும் சாம்பார் பொடி போட்டு வறுக்கவும்.
பின்னர் புளியை கெட்டியாக கரைத்து விட்டு உப்பு சேர்த்து நறுக்கிய சேனைக்கிழங்கு துண்டுகளை சேர்க்கவும்.
நன்றாக கொதித்து வற்றியவுடன் அரிசிமாவை சிறிது தண்ணீரில் கரைத்து விட்டு எல்லாம் சேர்ந்து கொதித்தபின் இறக்கவும்.
வேண்டுமென்றால் அப்பளத்தை சிறு துண்டுகளாக்கி பொரித்து போடலாம்.

நவரத்ன குருமா

2011-08-03T23:05:00.000-07:00

.

தேவையானவை:
காரட் 1/4 கப்
பீன்ஸ் 1/4 கப்
உருளைக்கிழங்கு 1/4 கப்
பச்சைப் பட்டாணி 1/4கப்
பனீர் துண்டுகள் 10
முந்திரி 5
வெங்காயம் 2

தக்காளி 2

மஞ்சள் தூள்,மிளகாய் பொடி,தனியா பொடி,garam masala

ஒவ்வொன்றும் ஒரு டீஸ்பூன்.

தேங்காய் பால் 1 கப்

தயிர் or cream 1/2 கப்

எண்ணைய்,உப்பு தேவையானது.

பொடி செய்ய:

சோம்பு 1 டீஸ்பூன்

தனியா 1 டீஸ்பூன்

மிளகு 1 டீஸ்பூன்

பட்டை சிறு துண்டு

ஏலக்காய் 2

Paste பண்ண:

பச்சை மிளகாய் 4

இஞ்சி ஒரு துண்டு

பூண்டு 4

செய்முறை:

முதலில் பீன்ஸ்,காரட்,உருளைக்கிழங்கு மூன்றையும் பொடியாக நறுக்கி பச்சை பட்டாணியுடன் சேர்த்து வதக்கி நன்றாக வெந்தவுடன் தனியே எடுத்துவைக்கவும்.

பனீர் துண்டுகளை எண்ணையில் பொரித்து எடுக்கவும்.

பொடி செய்ய கொடுத்துள்ளவைகளை நன்றாக எண்ணையில் வறுத்து பொடி பண்ணவும்.

பச்சைமிளகாய்,இஞ்சி,பூண்டு மூன்றையும் விழுது போல அரைத்துக்கொள்ளவும்.

ஒரு வாணலியை எடுத்துக்கொண்டு அதில் சிறிது எண்ணைய் விட்டு வெங்காயத்தை பொன்னிறமாக வதக்கவும்.வெங்காயம் நன்றாக வெந்ததும் நறுக்கிய தக்காளியைப்போட்டு

வதக்கவும்.பொடிபண்ணிய பவுடரையும்,paste யும் போட்டு சிறிது வதங்கிய வுடன் மஞ்சள்தூள்,மிளகாய் தூள்,தன்யா பொடி மூன்றையும் சேர்க்கவும்.இந்த கலவையில்

வெந்த காய்கறிகளையும் சிறிது தண்ணீரும்,உப்பும் சேர்த்து நன்றாகக்கலந்து கொதிக்கவக்கவும்.

தேங்காய்பால்,தயிர் இரண்டையும் சேர்த்து ஒரு நிமிடம் வைத்து இறக்கவும்.அடுப்பை அணைக்கும் முன் பனீர் துண்டுகளை சேர்த்து நன்றாக கிளறவும்.

கடைசியில் வறுத்த முந்திரியை சேர்க்கவும்.

ரவா பொங்கல்

2011-07-28T05:34:00.000-07:00

தேவையானவை:

ரவா 1 கப்
மஞ்சள் தூள் 1 டீஸ்பூன்
பெருங்காயத்தூள் 1 டீஸ்பூன்
---
பயத்தம்பருப்பு 1/4 கப்
இஞ்சி ஒரு சிறிய துண்டு
பச்சைமிளகாய் 2
மிளகு 1 டேபிள்ஸ்பூன்
சீரகம் 1 டேபிள்ஸ்பூன்
நெய் 2 டேபிள்ஸ்பூன்
கறிவேப்பிலை சிறிதளவு
முந்திரிபருப்பு 10
உப்பு,எண்ணைய் தேவையானது
---
செய்முறை:

பயத்தம்பருப்பை ஒரு கப் தண்ணீரில் மஞ்சள்தூள்,பெருங்காய்த்தூள் சேர்த்து வேகவைக்கவேண்டும். பருப்பு நன்கு குழைய வேண்டும்.குக்கரிலும் வைக்கலாம். 4 விசில் விடவேண்டும்.

ஒரு கடாயை எடுத்துக்கொண்டு ஒரு டேபிள்ஸ்பூன் நெய்,ஒரு டேபிள்ஸ்பூன் எண்ணைய் விட்டு முதலில் மிளகை பொறிக்கவேண்டும். பின்னர் சீரகத்தை பொறித்து அதனுடன் பொடியாக நறுக்கிய இஞ்சி,பச்சைமிளகாய்,கறிவேப்பிலை சேர்த்து வதக்கவேண்டும்.தயாராக உள்ள பயத்தம்பருப்பை இதனுடன் சேர்த்து கிளறவேண்டும்.

இன்னொரு அடுப்பில் இரண்டு கப் தண்ணீரை ஒரு பாத்திரத்தில் கொதிக்கவிடவேண்டும். தண்ணீர் கொதித்தவுடன் பயத்தம்பருப்பு கலவையுடன் உப்புடன் சேர்த்து கிளறவேண்டும்.
ரவையை பரவலாக கட்டித் தட்டாமல் தூவிக்கொண்டே கிளறவேண்டும்,பயத்தம்பருப்பும் ரவையும் நன்றாக சேர்ந்து வந்தபின் அடுப்பை அணைத்து வறுத்த முந்திரியை போடவேண்டும்.

ரவா பொங்கலுக்கு பொருத்தமான side dish தேங்காய் சட்னி.

தேங்காய் பால் குருமா

2011-07-22T02:58:00.000-07:00

தேவையானவை:

தேங்காய் பால் 2 கப்
உருளைக்கிழங்கு 2
சின்ன வெங்காயம் 10
காரட் 2
தக்காளி 2
தண்ணீர் 1/4 கப்

அரைக்க:

தேங்காய் துருவியது 2 டேபிள்ஸ்பூன்
பொட்டுக்கடலை 1/4 கப்
முந்திரிபருப்பு 10
பச்சைமிளகாய் 2
கசகசா 1 டீஸ்பூன்

தாளிக்க:

பட்டை,லவங்கம்,சோம்பு எல்லாம் சிறிதளவு.

செய்முறை:

உருளைக்கிழங்கை வேகவைத்து தோலுரித்து சிறிய துண்டுகளாக நறுக்கிக்கொள்ளவும்.
சின்ன வெங்காயத்தை தோலுரித்துக்கொள்ளவும்.
காரட்,தக்காளி இரண்டையும் பொடியாக நறுக்கக்ிகொள்ளவும்.
அரைக்கக்கொடுத்துள்ள பொருட்களை விழுது போல அரைத்துக்கொள்ளவும்.

வாணலியில் எண்ணைய் வைத்து தாளிக்கவேண்டிய பொருட்களை வறுக்கவும்.
பின்னர் சின்ன வெங்காயத்தை போட்டு நன்கு வதக்கவும்.
அதனுடன் நறுக்கிய உருளைக்கிழங்கு,காரட்,தக்காளி,தேவையான உப்பு சேர்த்து வதக்கவும்.
அரைத்த விழுதுடன் கால் கப் தண்ணீர் சேர்த்து கொதிக்கவிடவும்.
கடைசியாக தேங்காய் பால் சேர்த்து ஒரு கொதி வந்ததும் இறக்கவும்.

இந்த குருமா இட்லி,தோசை,சப்பாத்தி ஆகியவற்றிற்கு சிறந்த side

ஒக்காரை

2011-07-10T06:48:00.000-07:00

தேவையானவை:

பயத்தம்பருப்பு 1 கப்

வெல்லம் (பொடித்தது) 1 1/2 கப்

தேங்காய் துருவல் 1/2 கப்

நெய் 1/4 கப்

ஏலக்காய் தூள் 1 டீஸ்பூன்

முந்திரி பருப்பு 10

செய்முறை:

பயத்தம்பருப்பை ஒரு மணிநேரம் தண்ணீரில் ஊறவைத்து வடிகட்டி நைசாக அரைக்கவேண்டும்.

அரைத்த விழுதை இட்லி தட்டில் ஆவியில் 15 நிமிடம் வைத்து எடுக்கவேண்டும்.

நன்றாக ஆறிய பின் மிக்சியில் பொடிக்கவேண்டும்.

வெல்லத்தை சிறிது தண்ணீர் வைத்து கரைந்ததும் வடிகட்டி அடுப்பில் வைத்து கம்பிப்பதம் வந்ததும்

பொடித்து வைத்துள்ள பயத்தம்பருப்பு தூள்,தேங்காய் துருவல் இரண்டையும் தூவி நன்கு கிளறவேண்டும்.

பின்னர் நெய் ஊற்றி கிளற உதிரியாக வரும்.

முந்திரி பருப்பை நெய்யில் வறுத்து சேர்க்கவேண்டும்.

அவரைக்காய் பொரியல்

2011-07-04T00:40:00.000-07:00

தேவையானவை: அவரைக்காய் 1/4 கிலோ

தேங்காய் துருவல் 1 டேபிள்ஸ்பூன்
பச்சைமிளகாய் 2
பொட்டுக்கடலை 1 டீஸ்பூன்
உப்பு,எண்ணைய் தேவையானது
----
தாளிக்க:
கடுகு 1 டீஸ்பூன்
உளுத்தம்பருப்பு 1 டீஸ்பூன்
கறிவேப்பிலை சிறிதளவு

செய்முறை:

அவரைக்காயின் நாரை அகற்றிவிட்டு பொடியாக நறுக்கிக்கொள்ளவும்.
ஒரு microwave bowl ல் நறுக்கியதை போட்டு தேவையான உப்பும்,சிறிது தண்ணீரும் சேர்த்து "H" ல் ஐந்து நிமிடம்
வைத்தால் போதும் வெந்துவிடும்.
அடுப்பில் வாணலியை வைத்து எண்ணையில் கடுகு,உளுத்தம்பருப்பு,கறிவேப்பிலை தாளித்து வேகவைத்த
அவரைத்துண்டுகளை சேர்த்து வதக்கவேண்டும்.
தேங்காய் துருவல்,பச்சைமிளகாய்,பொட்டுக்கடலை மூன்றையும் தண்ணீர் விடாமல் பொடி பண்ணி இதனுடன்
சேர்த்து ஒரு பிரட்டு பிரட்ட வேண்டும்.

கார்ன் ரவா உப்புமா

2011-06-27T07:55:00.000-07:00

தேவையானவை:

கார்ன் ரவை 1 கப்

முழு பாசிப்பயறு 1 கப்

வெங்காயம் 1

தக்காளி 2

பூண்டு 3 பல்

பச்சைமிளகாய் 2

இஞ்சி 1 துண்டு

மிளகு தூள் 1 டீஸ்பூன்

உப்பு,எண்ணய் தேவையானது

கொத்தமல்லித்தழை சிறிதளவு
-----
தாளிக்க:
கடுகு 1 டீஸ்பூன்
உளுத்தம்பருப்பு 1 டீஸ்பூன்
கறிவேப்பிலை சிறிதளவு
------
செய்முறை:

கார்ன் ரவை கடைகளில் கிடைக்கும்.

முழு பாசிப்பயறை தண்ணீரில் 8 மணிநேரம் ஊறவைத்து வடிகட்டி ஒரு ஈரத்துணியில் சுற்றி வைக்கவேண்டும்

அடுத்தநாள் முளை கட்டிவிடும்.முளைகட்டாவிட்டால் மீண்டும் பயறை தண்ணீரில் அலசி விட்டு ஈரத்துணியில் சுற்றி

வைத்தால் இரண்டாம் நாள் முளைகட்டிவிடும்.பின்னர் அதை இட்லி தட்டில் ஆவியில் வைத்து எடுக்கவேண்டும்.(4 நிமிடம்).

கார்ன் ரவையை தண்ணீரில் அரை மணிநேரம் ஊறவைக்கவேண்டும்.

வெங்காயம்,தக்காளி,இஞ்சி,பூண்டு எல்லாவற்றையும் பொடியாக நறுக்கிக்கொள்ளவேண்டும்.

பச்சைமிளகாயை நீளவாக்கில் நறுக்கிக்கொள்ளவேண்டும்.
--------
அடுப்பில் வாணலியை வைத்து எண்ணைய் சேர்த்து தாளிக்கக் கொடுத்துள்ளவைகளை தாளிக்கவேண்டும்.
பின்னர் வெங்காயம்,தக்காளி,பூண்டு,இஞ்சி,பச்சைமிளகாய் எல்லாவற்றையும் நன்கு வதக்கி தேவையான தண்ணீர் சேர்க்கவேண்டும்.
(ஒரு கப் ரவைக்கு 2 கப் தண்ணீர் வீதம்).
தண்ணீர் கொதித்தவுடன் ஆவியில் வேகவைத்த முழு பாசிப் பயறு,ஊறவைத்த கார்ன் ரவை, தேவையான உப்பு எல்லாவற்றையும் சேர்த்து
நன்கு கிளறவேண்டும்.

கடைசியில் மிளகு தூள் தூவி கொத்தமல்லித்தழையால் அலங்கரிக்கவும்.

சுண்டைக்காய் பிரட்டல்

2011-06-19T07:57:00.000-07:00

தேவையானவை:

சுண்டைக்காய் 1 கப்

வெங்காயம் 1
மஞ்சள்தூள் 1 டீஸ்பூன்
மசாலா தூள் 1 டீஸ்பூன்
எள்ளுப்பொடி 1 டீஸ்பூன்
உப்பு,எண்ணைய் தேவையானது
-------
தாளிக்க:
கடுகு 1 டீஸ்பூன்
உளுத்தம்பருப்பு 1 டீஸ்பூன்
கறிவேப்பிலை சிறிதளவு
-----
செய்முறை:

சுண்டைக்காய் ஒவ்வொன்றையும் தனித்தனியாக இடிக்கவேண்டும்.(நறுக்குவதற்கு பதில் இடித்தால் சுவையாக இருக்கும்).
எள்ளுப்பொடிக்கு எள்ளை வெறும் வாணலியில் வறுத்து பொடி செய்து கொள்ளவேண்டும்.
-------
அடுப்பில் கடாயை வைத்து சிறிது எண்ணைய் சேர்த்து கடுகு,உளுத்தம்பருப்பு,கறிவேப்பிலை தாளிக்கவும்.
பின்னர் வெங்காயத்தை பொடியாக நறுக்கி பொன்னிறமாக வதக்கவேண்டும்.
அதனுடன் சுண்டைக்காயை சேர்த்து வதக்கி சிறிது வெந்ததும் தேவையான உப்பு, மஞ்சள்தூள்

மசாலா தூள்,எள்ளுப்பொடி
சேர்த்து நன்கு கிளறி இறக்கவேண்டும்.

சுரைக்காய் கூட்டு

2011-06-12T03:32:00.000-07:00

தேவையானவை:

சுரைக்காய் 1
கடலைபருப்பு 1/4 கப்
மஞ்சள்தூள் 1 டீஸ்பூன்
உப்பு,எண்ணய் தேவையானது
-----
அரைக்க:
தேங்காய் துருவல் 1/4 கப்
பச்சைமிளகாய் 3
இஞ்சி 1 துண்டு
நிலக்கடலை 1 டேபிள்ஸ்பூன்
-----
தாளிக்க:
தேங்காயெண்ணைய் 1 டேபிள்ஸ்பூன்
கடுகு 1 டீஸ்பூன்
உளுத்தம்பருப்பு 1 டீஸ்பூன்
கறிவேப்பிலை சிறிதளவு
----
செய்முறை:

சுரைக்காயை தோலை எடுத்துவிட்டு சிறுசிறு துண்டுகளாக நறுக்கிக்கொள்ளவும்.
கடலைபருப்பை தண்ணீரில் பத்து நிமிடம் ஊறவைக்கவும்.
அரைக்க கொடுத்துள்ளவைகளை விழுது போல அரைத்துக்கொள்ளவும்.
-----
ஒரு வாணலியை எடுத்துக்கொண்டு அதில் ஊறவைத்த கடலைபருப்பை சிறிது தண்ணீருடன் சேர்த்து வேகவைக்கவும்..பின்னர் நறுக்கிய சுரைக்காய் துண்டுகளை மஞ்சள்தூளுடன் சேர்த்து வேகவிடவும்.
சுரைக்காய் வெந்ததும் தேவையான உப்பு,அரைத்த விழுது சேர்த்து நன்கு கலந்து கொதிக்கவிடவும்.
இறக்கியவுடன் தேங்காயெண்ணையில் கடுகு,உளுத்தம்பருப்பு,கறிவேப்பிலை தாளிக்கவும்.
சுரைக்காய் கூட்டை சாதத்தோடு பிசைந்து சாப்பிடலாம்.
பூரி சப்பாத்திக்கும் ஏற்றது.

கொத்தவரை உசிலி

2011-06-05T05:22:00.000-07:00

தேவையானவை:
கொத்தவரங்காய்2 கப் (பொடியாக நறுக்கியது)
துவரம்பருப்பு 1/2 கப்

கடலைப்பருப்பு 1/2 கப்

மிளகாய் வற்றல் 4

பெருங்காயம் 1 துண்டு

மஞ்சள்தூள் 1/2 டீஸ்பூன்

கறிவேப்பிலை சிறிதளவு

உப்பு,எண்ணைய் தேவையானது
---
தாளிக்க:

கடுகு,உளுத்தம்பருப்பு சிறிதளவு

செய்முறை:

கொத்தவரங்காயைபொடியாக நறுக்கிக்கொள்ளவும்.

துவரம்பருப்பு,கடலைபருப்பு,மிளகாய்வற்றல்,பெருங்காயம் நான்கையும் ஒரு மணிநேரம் தண்ணீரில்

ஊறவைத்து வடிகட்டி சிறிது உப்பு சேர்த்து நைசாக அரைக்கவும்.

அரைத்த விழுதை இட்லி தட்டில் வைத்து ஆவியில் 15 நிமிடம் வேகவைக்கவும்.

ஆவியில் வேகவைத்த பருப்புகளை நன்கு உதிர்க்கவும்.(மிக்சியில் ஒரு சுற்று சுற்றினால் உதிரியாக வரும்)

வாணலியில் எண்ணைய் வைத்து கடுகு,உளுத்தம்பருப்பு தாளித்து

கொத்தவரை ,கறிவேப்பிலை,உப்பு சேர்த்து நன்கு வதக்கவும்.
கொத்தவரைவதங்கினவுடன் உதிர்த்த பருப்புகளை சேர்த்து சிறிது எண்ணைய் விட்டு நன்றாக கிளறவும்.
உதிரி உதிரியாக வரும்.

சீனிக்கிழங்கு பொரியல்

2011-05-30T21:18:00.000-07:00

தேவையானவை:

சர்க்கரைவள்ளிகிழங்கு 2

மஞ்சள்தூள் 1/2 டீஸ்பூன்

உப்பு,எண்ணைய் தேவையானது

--------

அரைக்க:

பச்சைமிளகாய் 2

இஞ்சி 1 துண்டு

தேங்காய் துருவல் 1 டேபிள்ஸ்பூன்

பொட்டுக்கடலை 1 டேபிள்ஸ்பூன்

-----

தாளிக்க:

கடுகு 1 டீஸ்பூன்

உளுத்தம்பருப்பு 1 டீஸ்பூன்

கறிவேப்பிலை 1 கொத்து

-----

செய்முறை:

சீனிக்கிழங்கின் தோலை எடுத்துவிட்டு சிறு சிறு துண்டுகளாக நறுக்கவும்.அரைக்கக் கொடுத்துள்ளவைகளை தண்ணீர் விடாமல் ரவை போல் அரைத்துக் கொள்ளவும்.

கடாயில் சிறிது தண்ணீர் விட்டு நறுக்கிய சர்க்கரைவள்ளித்துண்டுகளை மஞ்சள்தூள் ,உப்பு சேர்த்து வேகவிட்டு வடிகட்டவும்.(ஐந்து நிமிடத்தில் வெந்து விடும்).வாணலியில் எண்ணைய் வைத்து தாளிக்கவேண்டியவைகளை தாளித்து வடிகட்டி வைத்துள்ள சீனிக்கிழங்கு துண்டுகளை சேர்த்து ஒரு பிரட்டு பிரட்டவும்.பின்னர் அரைத்து வைத்துள்ளதை போட்டு நன்கு கிளறி எடுத்து வைக்கவும்.

இந்த் பொறியல் மிகவும் சுவையாக இருக்கும்.குழந்தைகள் விரும்பி சாப்பிடுவார்கள்.

வாழைத்தண்டு ரசம்

2011-05-25T22:48:00.000-07:00

தேவையானவை:

வாழைத்தண்டு 1/2 அடி துண்டு ஒன்று

துவரம்பருப்பு 1/2 கப்

தக்காளி 2

பச்சைமிளகாய் 2

மஞ்சள்தூள் 1 டீஸ்பூன்

கொத்தமல்லித்தழை சிறிதளவு

------

பொடி பண்ண:

மிளகாய் வற்றல் 2

மிளகு 1 டீஸ்பூன்

சீரகம் 1 டீஸ்பூன்

-------

தாளிக்க:

கடுகு 1 டீஸ்பூன்

பெருங்காயத்தூள் 1/2 டீஸ்பூன்

கறிவேப்பிலை ஒரு கொத்து

--------

செய்முறை:

வாழைத்தண்டை பொடியாக

நறுக்கிக்கொண்டு சிறிது தண்ணீர் மஞ்சள்தூள் சேர்த்து குக்கரில் துவரம்பருப்போடு (இரண்டையும் தனித்தனி அடுக்கில்) வைத்து வேகவைக்கவும்.

மிளகாய் வற்றல்,மிளகு,சீரகம் மூன்றையும் சிறிது எண்ணையில்வறுத்து பொடி பண்ணிக்கொள்ளவும்.
தக்காளியை பொடியாக நறுக்கி கொள்ளவும்.
பச்சைமிளகாயை நீட்ட வாக்கில் கீறிக்கொள்ளவும்.
------
குக்கரில் இருந்து எடுத்த வாழைத்தண்டை அதிலிருந்த தண்ணீருடன் மிக்சியில் நன்கு அரைத்து வடிகட்டவேண்டும்.

வெந்த துவரம்பருப்பை நன்றாக கடைந்துகொண்டு அதனுடன் வாழைத்தண்டு சாறு,தக்காளி,பச்சைமிளகாய்,அரைத்த பொடி,தேவையான உப்பு

எல்லாவற்றையும் சேர்த்து நன்கு கொதிக்கவைக்கவேண்டும்.

கடைசியில் கடுகு,பெருங்காயத்தூள்,கறிவேப்பிலை தாளித்து அரிந்த கொத்தமல்லித்தழையை சேர்க்கவும்

பனீர் மஷ்ரூம் மசாலா.....

2011-05-23T22:12:00.000-07:00

தேவையானவை:

பனீர் துண்டுகள் 10

மஷ்ரூம் துண்டுகள் 10

குடமிளகாய் 1

வெங்காயம் 1

காரட் 2

மஞ்சள் தூள் 1 டீஸ்பூன்

மிளகு தூள் 1 டீஸ்பூன்

இஞ்சி பூண்டு விழுது 1 டீஸ்பூன்

வெண்ணைய் 1 டேபிள்ஸ்பூன்

உப்பு,எண்ணைய் தேவையானது

-------

பொடி பண்ண:

பட்டை ஒரு துண்டு

கிராம்பு 4

சோம்பு 1 டீஸ்பூன்

--------

செய்முறை:

மஷ்ரூமை தண்ணீரில் நன்றாக அலசி சிறு துண்டுகளாக வெட்டிக்கொள்ளவும்.

கடாயில் சிறிது வெண்ணைய் சேர்த்து மஷ்ரூம் துண்டுகளை ஒரு பிரட்டு பிரட்டி தனியே எடுத்து வைக்கவும்.

பனீர் துண்டுகளை வென்னீரில் போட்டு எடுக்கவும்.

வெங்காயம்,காரட்,குடமிளகாய் மூன்றையும் துண்டுகளாக நறுக்கிக்கொள்ளவும்.

பட்டை,சோம்பு,கிராம்பு மூன்றையும் எண்ணையில் வறுத்து பொடி செய்து கொள்ளவும்.

--------

ஒரு கடாயை அடுப்பில் வைத்து எண்ணைய் ஊற்றி வெங்காயத்தை பொன்னிறமாக வதக்கவும்.

அதனுடன் காரட்,குடமிளகாய் துண்டுகளை சேர்த்து வதக்கவும்.

குடமிளகாய்,காரட் இரண்டும் சிறிது வெந்ததும் தேவையான உப்பு,மஞ்சளதூள்,மிளகு தூள்,இஞ்சி பூண்டு விழுது,

சிறிது தண்ணீர் சேர்த்து கொதிக்கவிடவும்.

பின்னர் மஷ்ரூம்,பனீர் அரைத்து வைத்துள்ள பொடி மூன்றையும் சேர்த்து மசாலா திக்காக வந்தவுடன் இறக்கி மீதமுள்ள வெண்ணையை சேர்க்கவும்.

பூரி,சப்பாத்திக்கு ஏற்றது.

அரைக்கீரை...காராமணி மசியல்

2011-05-16T22:58:00.000-07:00

தேவையானவை: அரைக்கீரை.

அரைக்கீரை 1 கட்டு

பயத்தம்பருப்பு 1/2 கப்

காராமணி 1/4 கப்

பச்சைமிளகாய் 2

------

அரைக்க:

தேங்காய் துருவல் 1/4 கப்

சீரகம் 1 டீஸ்பூன்

மிளகு 10

-----

பொடி பண்ண:

வெந்தயம் 1 டீஸ்பூன்

பெருங்காயம் 1 துண்டு

-----

தாளிக்க:

கடுகு 1 டீஸ்பூன்

உளுத்தம்பருப்பு 1 டீஸ்பூன்

கறிவேப்பிலை ஒரு கொத்து

------

கொத்தமல்லித்தழை சிறிதளவு

செய்முறை:

அரைக்கக் கொடுத்துளவைகளை நன்றாக விழுது போல அரைத்துக்கொள்ளவும்.

வெந்தயம் பெருங்காயம் இரண்டையும் எண்ணையில் வறுத்து பொடி பண்ணிகொள்ளவும்.

அரைக்கீரையை நன்கு ஆய்ந்து பொடியாக நறுக்கிக்கொள்ளவும்.

குக்கருக்குள் வைக்கும் ஒரு பாத்திரத்தை எடுத்துக்கொண்டு அதில் முதலில் பயத்தம்பருப்பு,காராமணி இரண்டையும் சிறிது தண்ணீருடன் வைத்து அதன் மேல் பொடியாக நறுக்கிய அரைக்கீரையை தேவையான உப்புடன் சேர்த்து குக்கருக்குள் வைத்து மூன்று விசில் வந்ததும் இறக்கவும்.

-----

கடாயில் எண்ணைய் வைத்து தாளிக்க வேண்டியவைகளை தாளித்து குக்கரில் இருந்து எடுத்த கீரை,காராமணிக் கலவையை சேர்க்கவேண்டும்.

அதனுடன் அரைத்த விழுதையும்,வெந்தய பெருங்காயப்பொடியையும் சேர்த்து கிளறவேண்டும்.

எல்லாம் சேர்ந்து நன்கு கொதித்தவுடன் இறக்கவும்.

கடைசியில் கொத்துமல்லித்தழையால் அலங்கரிக்கவும்.

பாதாம் பக்கோடா

2011-05-08T07:46:00.000-07:00

தேவையானவை:
பாதாம்பருப்பு 20
கடலைமாவு 1 கப்
அரிசிமாவு 1/4 கப்
மைதாமாவு 1 மேசைக்கரண்டி
------
இஞ்சி 1 துண்டு (பொடியாக நறுக்கியது)
மிளகாய்தூள் 1 மேசைக்கரண்டி
கறிவேப்பிலை 1 கொத்து
நெய் 1 மேசைக்கரண்டி
உப்பு,எண்ணைய் தேவையானது
------
செய்முறை:

பாதாம் பருப்பை அரைமணிநேரம் தண்ணீரில் ஊறவைத்து தோலுரித்து நன்றாக துடைக்கவும்.அடுப்பில் கடாயை வைத்து நெய் சேர்த்து காய்ந்ததும் பாதாம்பருப்பை ஒரு பிரட்டு பிரட்டவேண்டும்.

ஒரு அகண்ட பாத்திரத்தை எடுத்துக்கொண்டு அதில் கடலை மாவு,அரிசிமாவு,மைதாமாவு,பொடியாக நறுக்கிய இஞ்சி,மிளகாய் தூள்,கறிவேப்பிலை,வறுத்த பாதாம் பருப்பு தேவையான உப்பு எல்லாவற்றையும் சேர்த்து சிறித் தண்ணீர் தெளித்து பக்கோடா பதத்திற்கு பிசைய வேண்டும்.
வாணலியில் எண்ணைய் வைத்து நன்கு காய்ந்ததும் பிசைந்து வைத்த பாதாம் பக்கோடாவை தனித்தனி உருண்டைகளாக போட்டு பொன்னிறமாக வந்ததும் எடுக்கவேண்டும்.
பள்ளியில் இருந்து வரும் சிறுவர் சிறுமிகளுக்கு விருப்பமான மாலைநேர சிற்றுண்டியாகும்.

காரட்- தேன் சாலட்

2011-05-01T20:18:00.000-07:00

தேவையானவை:
துருவிய காரட் 1 கப்
உலர்ந்த திராட்சை 10
பச்சை திராட்சை 10
தேன் 2 டேபிள்ஸ்பூன்
red chilli flakes 1
உப்பு 1/2 டீஸ்பூன்
--------
செய்முறை:

இரண்டு மிளகாய் வற்றலை எண்ணையில் சிறிது வறுத்து மிக்சியில் ஒரு சுற்று சுற்றவேண்டும்.பொடி பண்ணக்கூடாது.இது தான் chilli flakes.

ஒரு அகண்ட பாத்திரத்தை எடுத்துக்கொண்டு அதில் தேன்,உப்பு,red chilli flakes மூன்றையும் சேர்த்து நன்கு கலக்கவும்.பிறகு அதனுடன் துருவிய காரட்,உலர்ந்த திராட்சை,பச்சை திராட்சை மூன்றையும் சேர்க்கவும்.
காரட்,தேன் சாலட் ரெடி.
இந்த சாலட்டை குழந்தைகள் மிகவும் விரும்பி சாப்பிடுவார்கள்.

குழிப்பணியாரம்

2011-04-27T04:25:00.000-07:00

தேவையானவை:

புழுங்கலரிசி 1 கப்

பச்சரிசி 1/2 கப்

உளுத்தம்பருப்பு 1/2 கப்

வெந்தயம் 1 டேபிள்ஸ்பூன்
------
வெங்காயம் 2

பச்சைமிளகாய் 4

இஞ்சி 1 துண்டு

உப்பு,எண்ணைய் தேவையானது
---------
தாளிக்க:

கடுகு 1 டீஸ்பூன்

உளுத்தம்பருப்பு 1 டீஸ்பூன்

மஞ்சள்தூள் 1/2 டீஸ்பூன்

கறிவேப்பிலை 1 கொத்து

செய்முறை:

புழுங்கலரிசி,பச்சரிசி,உளுத்தம்பருப்பு,வெந்தயம் நான்கையும் ஊறவைத்து நைசாக அரைத்துக்கொள்ளவேண்டும்.

தேவையான உப்பை சேர்த்து நன்கு கலக்கவேண்டும்.நான்கு மணிநேரம் கழித்து

அதில் வெங்காயம்,பச்சைமிளகாய்,இஞ்சி மூன்றையும் பொடியாக நறுக்கி போடவேண்டும்.பின்னர் கடுகு,உளுத்தம்பருப்பு,மஞ்சள்தூள்,கறிவேப்பிலை தாளித்து அதனுடன் சேர்க்கவேண்டும்.

----

குழிப்பணியாரக்கல்லை அடுப்பில் வைத்து காய்ந்ததும் எல்லாக்குழிகளிலும் எண்ணைய் ஊற்றி மாவை சிறு கரண்டியால் ஊற்றவேண்டும்.மாவு வெந்ததும் திருப்பிப்போட்டு (குச்சியால் திருப்பவேண்டும்) மீண்டும் கொஞ்சம் எண்ணைய் ஊற்றி எடுக்கவேண்டும்.

வெங்காய்ம்,தக்காளி சட்னியுடன் சாப்பிட சுவையாக இருக்கும்.

சப்போட்டா ....பேரிச்சம்...டிலைட்...

2011-04-20T22:52:00.000-07:00

தேவையானவை:

சப்போட்டா பழம் 3

பேரிச்சம்பழம் 4

பால் 1/2 கப்

ஏலக்காய் 2

பனங்கல்கண்டு பொடி 1/2 டீஸ்பூன்

தேன் 1 டீஸ்பூன்

-------

செய்முறை:

பேரிச்சம்பழத்தை உள்ளே இருக்கும் கொட்டையை எடுத்துவிட்டு கால் கப் தண்ணீரில் அரை மணிநேரம் ஊறவைக்கவேண்டும்.

சப்போட்டா பழத்தின் தோலை நீக்கி உள்ளே இருக்கும் விதையை எடுத்துவிட்டு பொடியாக நறுக்கிக்கொள்ளவும்.

-------

ஊறவைத்த பேரிச்சம்பழம் (தண்ணீருடன்) பொடியாக நறுக்கிய சப்போட்டா பழம்,ஏலக்காய்,பனங்கல்கண்டு பொடி எல்லாவற்றையும் மிக்சியில் போட்டு நன்றாக அரைக்கவேண்டும்.

பின்னர் பாலை சேர்த்து மீண்டும் மிக்சியில் ஒரு சுற்று சுற்றவேண்டும்.

மிக்சியிலிருந்து எடுத்து ஒரு பாத்திரத்தில் வைத்து தேனைக் கலந்து fridge ல் ஒரு மணிநேரம் வைத்து எடுத்து சாப்பிட சுவையாக இருக்கும்.

மாங்காய் சாதம்

2011-04-17T23:06:00.000-07:00

தேவையானவை:

பாசுமதி அரிசி 1 கப்

துருவிய மாங்காய் 1 கப்

மஞ்சள் தூள் 1 டீஸ்பூன்

நெய் 1 டேபிள்ஸ்பூன்

சோம்பு 1 டீஸ்பூன்

உப்பு,எண்ணைய் தேவையானது
-------
மசாலா பவுடர் செய்ய தேவையானது:

துருவிய தேங்காய் 1 கப்

தனியா 1 டேபிள்ஸ்பூன்

சீரகம் 1 டீஸ்பூன்

சிவப்பு மிளகாய் 4

கிராம்பு 2

ஏலக்காய் 2

ஜாதிக்காய் பவுடர் 1/2 டீஸ்பூன்
------
அலங்கரிக்க:

முந்திரிபருப்பு 5

பாதாம் பருப்பு 5

நிலக்கடலை 5
--------
செய்முறை:

மசாலா பவுடர் செய்ய கொடுத்துள்ளவைகளை எண்ணையில் வறுத்து பொடி பண்ணிக்கொள்ளவும்.

பாசுமதி அரிசியை ஒரு கப்புக்கு 1 1/2 கப் வீதம் தண்ணீர் வைத்து அரைமணிநேரம் ஊறவைக்கவேண்டும்.

மாங்காய் துருவலுடன் அரைத்த பொடி பாதி அளவு,மஞ்சள்தூள்,தேவையான உப்பு சேர்த்து நன்கு பிசறி

பத்து நிமிடம் ஊறவைக்கவேண்டும்.

கடாயில் நெய் சேர்த்து சோம்பை தாளித்து மாங்காய் கலவையை சேர்த்து சிறிது வதக்கிக்கொள்ளவும்.

Ele.cooker ஐ எடுத்துக்கொண்டு அதில் ஊறவைத்த பாசுமதி அரிசி (தண்ணீருடன்),மாங்காய் கலவை,மீதமுள்ள மசாலா பொடி எல்லாவற்றையும் சேர்த்து நன்கு கலந்து வைக்கவேண்டும்.

மாங்காய் சாதம் தயாரானவுடன் வறுத்த முந்திரிபருப்பு,பாதம்,நிலக்கடலையால் அலங்கரிக்கவும்.

ஸ்வீட் பொடேடோ போளி

2011-04-14T04:10:00.000-07:00

பூரணத்திற்கு தேவையானவை:

ஸ்வீட் பொடேடோ
(சர்க்கரை வள்ளிக்கிழங்கு) 2
வெல்லம் (பொடித்தது) 1 கப்
ரவை 1 டேபிள்ஸ்பூன்
ஏலக்காய் தூள் 1/2 டீஸ்பூன்
-------
மேல்மாவு தயாரிக்க தேவையானவை:
மைதா மாவு 1 கப்
நெய் 1/4 கப்
கேசரி பவுடர் 1/2 டீஸ்பூன்
உப்பு ஒரு சிட்டிகை
------
செய்முறை:

ஒரு அகண்ட பாத்திரத்தை எடுத்துக்கொண்டு அதில் மைதாமாவு,ஒரு டேபிள்ஸ்பூன் நெய்,உப்பு,கேசரி பவுடர் எல்லாவற்றையும் சேர்த்து கைகளால் நன்கு பிசறி தண்ணீர் தெளித்து சப்பாத்தி மாவு போல பிசைந்து கொள்ளவேண்டும்.

சர்க்கரை வள்ளிக்கிழங்கை வேகவைத்து தோலுரித்து மசித்துக்கொள்ளவேண்டும்.
அதனுடன் பொடித்த வெல்லம்,ரவை,ஏலக்காய் தூள் சேர்த்து நன்கு பிசைந்து கொள்ளவேண்டும்.

பிசைந்த மைதா மாவை ஒரு உருண்டை எடுத்து சப்பாத்தி மாதிரி இட்டு அதன் மேல் தயாராக உள்ள பூரணத்தை சிறிதளவு வைத்து நான்கு புறமும் மூடி மறுபடியும் சப்பாத்தி மாதிரி இடவேண்டும்.(பிசைந்த மாவை ஒரு உருண்டை plastic sheet ல் எண்ணைய் தடவி அதன் மேல் வைத்து உள்ளே பூரணத்தை வைத்து கையால் சிறிது தட்டிமேலே இன்னொரு plastic sheet ஆல் மூடி சப்பாத்தி தேய்க்கும் கட்டையிலும் எண்ணைய் தடவி இடலாம்)

தோசைக்கல்லை அடுப்பில் வைத்து காய்ந்தவுடன் இட்ட போளியை போட்டு சிறிது நெய் ஊற்றி இருபுறமும் சிவந்தவுடன் எடுக்கவேண்டும்

மாங்காய்-வேப்பம் பூ பச்சடி

2011-04-11T23:45:00.000-07:00

வாழ்க்கை என்பது..இன்பமும்..துன்பமும் கலந்தது என்பதை உணர்த்தவே..சித்திரை மாத பிறப்புக்கு இனிப்பும்..சற்றுக் கசப்பும் உள்ள இந்த பச்சிடிகள் செய்வது வழக்கம்

மாங்காய் இனிப்பு பச்சடி:

தேவையானவை:
மாங்காய் 1
வெல்லம் 1/2 கப் (பொடித்தது)
மஞ்சள்தூள் 1/2 டீஸ்பூன்
அரிசிமாவு 1 டீஸ்பூன்
கடுகு 1 டீஸ்பூன்
பச்சைமிளகாய் 2
உப்பு தேவையானது

செய்முறை:

மாங்காயை தோலைச் சீவி துண்டுகளாக நறுக்கிக்கொள்ளவும்.

ஒரு அகண்ட பாத்திரத்தை எடுத்துக்கொண்டு அதில்சிறிது தண்ணீர் விட்டு மாங்காய் துண்டுகள்,உப்பு,மஞ்சள்தூள் சேர்த்து வேகவிடவும்.மாங்காய் வெந்ததும் பொடித்த வெல்லத்தைப் போட்டு வெல்லம் கரைந்து சேர்ந்த பின் அரிசிமாவு கரைத்து விட்டு கொதிக்கவிடவும் .அடுப்பை அணைத்து கடுகு பச்சைமிளகாய் தாளித்து கொட்டவும்.

வேப்பம் பூ பச்சடி

தேவையானவை:
வேப்பம் பூ 2 டேபிள்ஸ்பூன்
புளி எலுமிச்சைஅளவு
வெல்லம் 1 டேபிள்ஸ்பூன் (பொடித்தது)
அரிசி மாவு 1 டீஸ்பூன்
--
கடுகு 1/2 டீஸ்பூன்
பெருங்காயத்தூள் 1/2 டீஸ்பூன்
கறிவேப்பிலை சிறிதளவு
மிளகாய் வற்றல் 3
உப்பு,எண்ணைய் தேவையானது

செய்முறை:

வேப்பம் பூ சிறிது எண்ணைய் விட்டு நல்ல கறும் சிவப்பாக வறுக்கவும்.
வாணலியில் எண்ணைய் விட்டு கடுகு,கிள்ளிய மிளகாய்வற்றல்.பெருங்காயத்தூள்,கறிவேப்பிலை தாளிக்கவும்.
புளியை அரைகப் தண்ணீரில் கரைத்துவிடவும்.உப்பு சேர்த்து நன்றாக கொதிக்கவிடவும்.பொடித்த வெல்லத்தைப் போட்டு நன்றாக கொதித்தபின் அரிசிமாவை கரைத்துவிடவும்.
இறக்கும் பொழுது வறுத்த வேப்பம் பூவை போடவேண்டும்.
(இரண்டும் சேர்த்து ஒரே பச்சடியாக செய்வோரும் உண்டு)

வடு மாங்காய்

2011-04-10T04:54:00.000-07:00

தேவையானவை:
மாவடு 1 கிலோ
உப்பு 1 கப்
மிளகாய் பொடி 1 கப்
கடுகு 1/4 கப்
மஞ்சள் துண்டு 3
விளக்கெண்ணைய் 1/4 கப்
தண்ணீர் 1 கப்
-----
செய்முறை:

மாவடு வாங்கும்பொழுது காம்புகள் உள்ள மாவடுவாக பார்த்து வாங்கவேண்டும்.
மாவடுவை நன்றாக அலசி தண்ணீரை வடிய வைத்து ஒரு டவலால் தண்ணீர் போக துடைக்கவேண்டும்.
ஒரு கப் தண்ணீரில் ஒரு கப் உப்பு சேர்த்து தண்ணீர் பாதியாகும் வரை கொதிக்கவைக்கவேண்டும்.
கடுகையும் மஞ்சள் துண்டையும் சேர்த்து விழுது போல அரைத்துக்கொள்ளவேண்டும்.
-----
ஒரு அகண்ட பாத்திரத்தை எடுத்துக்கொண்டு அதில் மாவடுவை போட்டு விளக்கெண்ணையை பரவலாக தடவவேண்டும்..அதனுடன் கடுகு மஞ்சள் விழுதை சேர்த்து நன்கு கலக்கவேண்டும்.
ஊறுகாய் போடும் ஜாடியை நன்றாக துடைத்து முதலில் சிறிது உப்பு தண்ணீர் அடியில் ஊற்றவும்.
அதன் மேல் கொஞ்சம் கலந்த மாவடுவை சிறிது போட்டு அதன் மேல் சிறிது உப்பு தண்ணீரும் மிளகாய் பொடியும் போடவும்.
இதே மாதிரி மாவடுவும்,உப்பும்,மிளகாய் பொடியுமாக கடைசிவரை போட வேண்டும்.
இரண்டு நாள் கழித்து ஜாடியை ஒரு குலுக்கு குலுக்கி நன்கு மூடி வைக்கவேண்டும்.

நெல்லி மோர்

2011-04-05T19:59:00.000-07:00

தேவையானவை:

மோர் 1 கப்

நெல்லிக்காய் 2

கறிவேப்பிலை சிறிதளவு

பெருங்காயத்தூள் 1/2 டீஸ்பூன்

உப்பு தேவையானது

-----

செய்முறை:

நெல்லிக்காயை microwave bowl ல் சிறிது தண்ணீர் வைத்து "H" ல் ஒரு நிமிடம் வைத்து எடுத்தால் நன்கு வெந்திருக்கும்.

மிக்சியில் அரை கப் மோர்,வேகவைத்த நெல்லிக்காய்,உப்பு,பெருங்காயத்தூள்,கறிவேப்பிலை சேர்த்து நைசாக அரைக்கவும்.

பின்னர் மீதமுள்ள அரை கப் மோரை சேர்த்து இரண்டு சுற்று சுற்ற வேண்டும்.

நெல்லி மோர் வெய்யிலுக்கு ஏற்றது.

நெல்லிக்காய் ரத்தத்தில் உள்ள குளுக்கோசின் அளவைக் கட்டுப்படுத்தி சர்க்கரை நோய் வராமல் தடுக்கிறது.

பார்லி சாலட்

2011-04-02T22:15:00.000-07:00

தேவையானவை:

பார்லி 1 கப்

பொடியாக நறுக்கிய

வெள்ளரிக்காய் 1 கப்

தக்காளி 1 கப்

மாங்காய் 1 கப்

காரட் 1 கப்

பச்சைமிளகாய் 2

ஆலிவ் ஆயில் 1 டேபிள்ஸ்பூன்

------

மிளகு தூள் 1 டீஸ்பூன்

எலுமிச்சை ஜூஸ் 1 டேபிள்ஸ்பூன்

உப்பு தேவையானது

----

செய்முறை:

பார்லியை நான்கு மணிநேரம் தண்ணீரில் ஊறவைக்கவேண்டும்.

பின்னர் குக்கரில் மூன்று விசில் வரும் வரை வைத்து எடுக்கவேண்டும்.

ஒரு அகண்ட பாத்திரத்தை எடுத்துக்கொண்டு அதில் குக்கரில் இருந்து எடுத்த பார்லியுடன் பொடியாக நறுக்கிய

வெள்ளரிக்காய்,தக்காளி,மாங்காய்,பச்சைமிளகாய் நான்கையும் ஆலிவ் ஆயிலுடன் கலக்கவேண்டும்.

கடைசியில் தேவையான உப்பும் மிளகு தூளும் சேர்த்து கலக்கவேண்டும்.

சாப்பிடுவதற்கு முன்பு எலுமிச்சை சாற்றை சிறிது கலந்து சாப்பிடவேண்டும்.

வாழைத்தண்டு தயிர் கூட்டு

2011-03-31T03:22:00.000-07:00

தேவையானவை:
வாழைத்தண்டு 1

தயிர் 1 கப்

உப்பு,எண்ணைய் தேவையானது
-------
அரைக்க:

தேங்காய் துருவல் 1/2 கப்

இஞ்சி 1 துண்டு

பச்சைமிளகாய் 3

சீரகம் 1/2 டீஸ்பூன்
---
தாளிக்க:

கடுகு 1 டீஸ்பூன்

உளுத்தம்பருப்பு 1 டீஸ்பூன்

கறிவேப்பிலை 1 கொத்து
------
செய்முறை:

வாழைத்தண்டின் தோலை நீக்கிவிட்டு சிறு சிறு துண்டுகளாக நறுக்கி ஒரு பாத்திரத்தில் தண்ணீர் வைத்து அதில் போடவும்.

அரைக்க கொடுத்துள்ளவைகள சிறிது தயிர் சேர்த்து விழுது போல அரைத்துக்கொள்ளவும்.

வாணலியில் சிறிது தண்ணீர் விட்டு வாழைத்தண்டு துண்டுகளை வேகவைக்கவும்.

சிறிது வெந்ததும் தேவையான உப்பு சேர்க்கவும்.(வாழைத்தண்டிற்கு அதிக உப்பு தேவைப்படாது)

பின்னர் அரைத்து வைத்துள்ள விழுதையும் மீதமுள்ள தயிரையும் சேர்த்து கொதிக்கவைக்கவேண்டும்.

நன்கு கொதித்தபின் கடுகு,உளுத்தம்பருப்பு, கறிவேப்பிலை தாளிக்கவும்.
---
வாழைத்தண்டு சிறுநீரக கற்களை கரைக்கும் சக்தி உடையது.

பலாக்காய் கறி

2011-03-29T05:29:00.000-07:00

தேவையானவை: பலாக்காய்

பலாக்காய் 1

வெங்காயம் 2

இஞ்சிபூண்டு விழுது 1 டேபிள்ஸ்பூன்

மஞ்சள்தூள் 1 டீஸ்பூன்

புளி 1 எலுமிச்சை அளவு

சர்க்கரை 1 டீஸ்பூன்

உப்பு,எண்ணைய் தேவையானது

-------

அரைக்க:

வெங்காயம் 1 டேபிள்ஸ்பூன்(பொடியாக நறுக்கியது)

தேங்காய் துருவல் 1/4 கப்

தனியா 1 டேபிள்ஸ்பூன்

கிராம்பு 2

சீரகம் 1 டீஸ்பூன்

பச்சைமிளகாய் 2

-------

தாளிக்க:

கடுகு 1 டீஸ்பூன்

உளுத்தம்பருப்பு 1 டீஸ்பூன்

கறிவேப்பிலை சிறிதளவு

தேங்காயெண்ணைய் 1 டேபிள்ஸ்பூன்

-----

செய்முறை:

பலாக்காயை தோலை எடுத்துவிட்டு சிறு சிறு துண்டுகளாக நறுக்கிக்கொள்ளவும்.நறுக்கிய துண்டுகளை தண்ணீரில் பத்து நிமிடம் ஊறவைக்கவேண்டும்.

வெங்காயத்தை பொடியாக நறுக்கிக் கொள்ளவேண்டும்.

அரைக்கக் கொடுத்துள்ளவைகளை அப்படியே மிக்சியில் விழுதாக அரைத்துக்கொள்ளவேண்டும்.

புளியை ஒரு கப் தண்ணீரில் கரைத்து வடிகட்டி வைத்துக்கொள்ளவேண்டும்.

------

ஒரு கடாயை அடுப்பில் வைத்து தாளிக்க வேண்டியவைகளை தாளித்து வெங்காயத்தை பொன்னிறமாக வதக்க வேண்டும்.

அதனுடன் இஞ்சிபூண்டு விழுது சேர்த்து வதக்கவேண்டும். இதனுடன் ஊறின பலாக்காயை வடித்து மஞ்சள்தூள் சேர்த்து வதக்கவேண்டும்.
பலாக்காய் வெந்தவுடன் உப்பு,புளித்தண்ணீர், அரைத்த விழுதுசேர்த்து நன்கு கொதிக்கவிடவேண்டும்.
எல்லாம் ஒன்றாக சேர்ந்தபின் சர்க்கரை சேர்த்து அடுப்பை அணைக்கவேண்டும்..

தென்மாவட்ட கொத்சு

2011-03-24T19:08:00.000-07:00

இந்த கொத்சு தஞ்சாவூர் மாவட்டத்தின் சிறப்பு.

தேவையானவை:

கத்திரிக்காய் 6

சின்ன வெங்காயம் 10

புளி ஒரு எலுமிச்சை அளவு

பெருங்காயத்தூள் 1/2 டீஸ்பூன்

நெய் 2 டேபிள்ஸ்பூன்

கறிவேப்பிலை 1 கொத்து

உப்பு,நல்லெண்ணைய் தேவையானது
---------
பொடி செய்ய:

கடலைப்பருப்பு 1 டேபிள்ஸ்பூன்

மிளகாய் வற்றல் 6

தனியா 1 டேபிள்ஸ்பூன்
-----
தாளிக்க:

கடுகு 1 டீஸ்பூன்

உளுத்தம்பருப்பு 1 டீஸ்பூன்
----
செய்முறை:

கத்திரிக்காயை சிறுசிறு துண்டுகளாக நறுக்கி நெய்யில் வறுத்து ஆறியபின் விழுதுபோல அரைத்துக்கொள்ளவேண்டும்.

அதே நெய்யில் வெங்காயத்தை பொன்னிறமாக வதக்கவேண்டும்.

அரைக்கக் கொடுத்துள்ளவைகளை எண்ணையில் வறுத்து பொடி செய்து கொள்ளவேண்டும்.
----
ஒரு கடாயை அடுப்பில் வைத்து அதில் நல்லெண்ணைய் ஊற்றி கடுகு உளுத்தம்பருப்பு தாளித்து புளியை
ஒரு கப் தண்ணீரில் கரைத்து தேவையான உப்புடன் கொதிக்கவைக்கவேண்டும்.
பின்னர் அதனுடன் அரைத்த கத்திரி விழுது,பொன்னிறமாக வதக்கிய வெங்காயம்,அரைத்த பொடி மூன்றையும்
சேர்த்து கொதிக்கவிடவேண்டும்.
எல்லாம் சேர்ந்து நன்கு கொதித்தபின் நல்லெண்ணையில் பெருங்காயத்தூள்,கறிவேப்பிலை பொறித்து சேர்க்கவேண்டும்.

நார்த்தங்காய் பச்சடி

2011-03-22T00:34:00.000-07:00

தேவையானவை:

நார்த்தங்காய் 2

பச்சைமிளகாய் 8

புளி ஒரு எலுமிச்சை அளவு

மஞ்சள்தூள் 1/2 டீஸ்பூன்

பொடித்த வெல்லம் 1/2 கப்

உப்பு,எண்னைய் தேவையானது

-------

தாளிக்க:

கடுகு 1 டீஸ்பூன்

கடலைப்பருப்பு 1 டீஸ்பூன்

பெருங்காயத்தூள் 1 டீஸ்பூன்

----

செய்முறை:

நார்த்தங்காய்,பச்சைமிளகாய் இரண்டையும் பொடியாக நறுக்கிக்கொள்ளவும்.

புளியை இரண்டு கப் தண்ணீரில் கரைத்து வடிகட்டிக்கொள்ளவும்.
---
வாணலியில் எண்ணைய் வைத்து தாளிக்க வேண்டியவைகளை தாளித்து அதனுடன் பொடியாக நறுக்கிய நார்த்தங்காய்

,பச்சைமிளகாய் இரண்டையும் மஞ்சள்தூள் சேர்த்து நன்கு வதக்கவும்.

நார்த்தங்காய் நன்றாக வெந்ததும் கரைத்து வைத்துள்ள புளிக்கரைசலை ஊற்றி உப்பு சேர்த்து கொதிக்கவிடவும்.

பின்னர் பொடித்த வெல்லத்தை சேர்க்கவும்.

வெல்லம் கரைந்து கெட்டியாக ஜாம் பதத்திற்கு வந்ததும் இறக்கவும்.

வெய்யிலுக்கு ஊறுகாய்க்கு பதிலாக இந்த பச்சடியை உபயோகிக்கலாம்

மசாலா லஸ்ஸி

2011-03-20T03:08:00.000-07:00

தேவையானவை:

தயிர் 2 கப்

நெல்லிக்காய் 2

மாங்காய் துண்டு 2

பச்சைமிளகாய் 2

கொத்தமல்லித்தழை சிறிதளவு

புதினா சிறிதளவு

இஞ்சி 1 துண்டு

பெருங்காயத்தூள் 1 டீஸ்பூன்

உப்பு தேவையானது

செய்முறை:

தயிரை நன்கு கடைந்துகொள்ளவும்.

நெல்லிக்காயை ஒரு microwave cupல் சிறிது தண்ணீருடன் 2 நிமிடம் வைத்தால் சிறிது வெந்திருக்கும்.

உள்ளே இருக்கும் கொட்டையை சுலபமாக எடுத்துவிடலாம்.

மாங்காய் துண்டுகளின் தோலை சீவிவிட்டு பொடியாக நறுக்கிக்கொள்ளவும்.

கொத்தமல்லித்தழை,புதினா இரண்டையும் நன்கு ஆய்ந்து கொள்ளவும்.

இஞ்சியின் தோலை சீவி பொடியாக நறுக்கிக்கொள்ளவும்.

--------

நெல்லிக்காய்,மாங்காய் துண்டுகள்,பச்சைமிளகாய்,கொத்தமல்லி,புதினா,இஞ்சி,பெருங்காயத்தூள்,
தேவையான உப்பு எல்லாவற்றையும் ஒரு கப் தயிரில் மிக்ஸியில் நைசாக அரைக்கவும்.

பின்னர் மீதமுள்ள ஒரு கப் தயிரையும் சேர்த்து ஒரு சுற்று சுற்றவும்.

மசாலா லஸ்ஸி வெய்யிலுக்கு குளிர்ச்சியைத் தரும்.

ஓலன்

2011-03-15T03:40:00.000-07:00

தேவையானவை:

பூசணி கீற்று 2

காராமணி 1 கப்

பச்சைமிளகாய் 4

தேங்காய் பால் 1 கப்

தேங்காய் எண்ணைய் 1 டேபிள்ஸ்பூன்

கடுகு 1 டீஸ்பூன்

உளுத்தம்பருப்பு 1 டீஸ்பூன்

செய்முறை:

பூசணி கீற்றுகளை தோலெடுத்து சிறு சிறு துண்டுகளாக நறுக்கிக்கொள்ளவும்.

காராமணியை லேசாக எண்ணையில்லாமல் வறுத்து ஒரு கப் தண்ணீரில் வேகவைக்கவும்

பச்சைமிளகாயை குறுக்கு வாட்டில் கீறிக்கொள்ளவும்.

------

அடுப்பில் ஒரு அகண்ட பாத்திரத்தை வைத்து அதில் நறுக்கிய பூசணித்துண்டுகள்,வேகவைத்த காராமணி,

பச்சைமிளகாய், ஒரு கப் தண்ணீர்,சேர்த்து வேகவைக்கவும்.

பூசணித்துண்டுகள் நன்றாக வெந்ததும் தேவையான உப்பு சேர்க்கவும்.

பின்னர் தேங்காய் பால் சேர்த்து கொதிக்கவிடவும்.

கடைசியில் தேங்காய் எண்ணையில் கடுகு,உளுத்தம்பருப்பு தாளித்துக் கொட்டவும்.

------

ஓலனை சாதத்தோடு பிசைந்தும் சாப்பிடலாம்.

சப்பாத்தி,பூரிக்கும் சிறந்த side dish ஆகும்.

ஓட்ஸ் இட்லி

2011-03-13T03:47:00.000-07:00

தேவையானவை:

ஓட்ஸ் 1 கப்
ரவை 1 கப்
தயிர் 1 1/2 கப்
காரட் 2
உருளைக்கிழங்கு 1
பீன்ஸ் 10
பட்டாணி 1/2 கப்
இஞ்சி 1 துண்டு
முந்திரிபருப்பு 10
நெய் 1 டீஸ்பூன்
உப்பு,எண்ணைய் தேவையானது

செய்முறை:

ஓட்ஸையும் ரவையயும் தனித்தனியாக எண்ணையில்லாமல் வறுக்கவும்.

பின்னர் தனித்தனியாக தண்ணீரில் 10 நிமிடம் ஊறவைக்கவும்.
காரட்டை துருவிக்கொள்ளவும்.
உருளைக்கிழங்கை தோலுரித்து துருவிக்கொள்ளவும்.
இஞ்சியை தோலுரித்து துருவிக்கொள்ளவும்.
பீன்ஸை பொடியாக நறுக்கிகொண்டு பட்டாணியுடன் microwave ல் சிறிது உப்பு சேர்த்து 3 நிமிடம் வைக்கவும்.

முந்திரிபருப்பை சிறு துண்டுகளாக்கி நெய்யில் வறுத்துக்கொள்ளவும்.
ஒரு அகண்ட பாத்திரத்தை எடுத்துக்கொண்டு அதில் 1 1/2 கப் தயிர் விட்டு
அதனுடன் தண்ணீரில் ஊறவைத்த ஓட்ஸையும் ரவையையும் சிறிது உப்புடன் சேர்த்து மீண்டும் 15 நிமிடம் ஊறவைக்கவேண்டும்.
15 நிமிடம் கழித்து தயிரில் துருவிய காரட்.உருளைக்கிழங்கு,இஞ்சி,வேகவைத்த பட்டாணி,பீன்ஸ்,வறுத்த முந்திரி எல்லாவற்றையும் சிறிது உப்புடன் சேர்த்து நன்கு கலக்கவேண்டும்.
இட்லி தட்டில் எண்ணைய் தடவி ஓட்ஸ் இட்லி மாவை ஊற்றி ஆவியில் 12 நிமிடம் வைத்து எடுக்கவேண்டும்.
இதற்கு side dish வெங்காய காரச்சட்னி .

தாளிச்ச சாதம்

2011-03-09T02:53:00.000-08:00

தேவையானவை:

பாசுமதி அரிசி 1 கப்

நல்லெண்ணைய் 2 டேபிள்சபூன்

கடலைபருப்பு 1 டீஸ்பூன்

உளுத்தம்பருப்பு 1 டீஸ்பூன்

புளி சிறிதளவு

மஞ்சள் தூள் 1/2 டீஸ்பூன்

மிளகாய் வற்றல் 4

கறிவேப்பிலை 1 கொத்து

கடுகு 1 டீஸ்பூன்
உப்பு தேவையானது

பெருங்காயத்தூள் 1 டீஸ்பூன்

முந்திரிபருப்பு 10

பாதாம் பருப்பு 5

செய்முறை:

பாசுமதி அரிசியை 1 1/2 கப் தண்ணீரில் அரை மணிநேரம் ஊறவைத்து அப்படியே ele.cooker ல் வைக்கவும்.

----------

தேவையானவற்றில் குறிப்பிட்டுள்ளவைகளை ரெடியாக ஒரு தட்டில் எடுத்து வைக்கவேண்டும்.

அடுப்பில் ஒரு கடாயில் 2 டேபிள்ஸ்பூன் நல்லெண்ணைய் விட்டு முதலில்

கடலைபருப்பு,உளுத்தம்பருப்பு தாளிக்கவேண்டும்.

அடுத்து புளியை நாரில்லாமல் எடுத்து எண்ணையில் போட்டு பொறிக்கவேண்டும்.

அதன்பின் மஞ்சள்தூள்,மிளகாய் வற்றல், பெருங்காயத்தூள், கறிவேப்பிலை சேர்க்கவேண்டும்.

பின்னர் கடுகை போட்டு வெடிக்க விடவேண்டும்.உப்பு சேர்க்கவேண்டும்..

கடுகு வெடித்தவுடன் முந்திரிபருப்பு துண்டுகள்,பொடித்த பாதாம்பருப்பு சேர்க்கவேண்டும்..

கடைசியாக உதிரியாக வடித்துள்ள சாதத்தை சேர்த்து நன்கு கிளறவேண்டும்.

----

இந்த தாளிச்ச சாதத்துக்கு அறுசுவையும் உண்டு.

பொறித்த அப்பளத்துடன் சாப்பிடலாம்.

இன்று சர்வதேச மகளிர் தினம்

2011-03-07T19:12:00.000-08:00

இன்று மகளிர்தின 100ஆவது ஆண்டு கொண்டாட்டம்.

1910ஆம் ஆண்டு டென்மார்க் தலைநகர் கோபன்ஹேகனில் உழைக்கும் மகளிர் சர்வதேச மகாநாடு நடந்தது.இந்த மாநாட்டில் பங்கேற்ற பெண்கள், வேலைவாய்ப்பில் பெண்களுக்கு சம வாய்ப்பு வழங்க வேண்டும் என வலியுறுத்தினர்.இது தொடர்பாக விழிப்புணர்வு ஏற்படுத்த சர்வதேச மகளிர் தினம் கொண்டாட வேண்டும் என்ற எண்ணத்தை பிரதிபலித்தனர்.

இதை அடுத்து 1911ஆம் ஆண்டு ஆஸ்திரியா,டென்மார்க்,ஜெர்மனி மற்றும் ஸ்விட்சர்லாந்தில் சர்வதேச மகளிர்தினம் கொண்டாடப்பட்டது.அன்றுமுதல் ஒவ்வொரு ஆண்டும் மர்ச் 8ஆம் நாள் உலகம் முழுதும் மகளிர்தினம் கொண்டாடப்படுகிறது.இன்று 100ஆவது ஆண்டு மகளிர்தினம்.

இந்த ஆண்டு ,மகளிர் கவுரவமான வேலையில் சேர்வதற்கான பாதையை உருவாக்கும் வகையில் கல்வி,பயிற்சி,தொழில்நுட்பம் ஆகியவற்றில் மகளிர்க்கு சமவாய்ப்புத் தரவேண்டும் என்பதே குறிக்கோளாக உள்ளது.

இந்தியாவைப் பொறுத்தவரை, மகளிர் ஈடுபடாதத் துறையில்லை எனலாம்.

நம் நாட்டின் முதல் குடிமகன்(ள்) ஒரு பெண்

நம்நாட்டை ஆளும் கட்சியின் தலைவர் ஒரு பெண்

பாராளுமன்ற எதிர்க்கட்சித் தலைவர் ஒரு பெண்

பாராளுமன்ற சபாநாயகர் ஒரு பெண்

ரயில்வேயின் மத்திய அமைச்சர் ஒரு பெண்

உத்தரபிரதேச முதல்வர் ஒரு பெண்

தில்லியின் முதல்வர் ஒரு பெண்

தமிழத்தில் ஆளும் கட்சியாய் இருந்து இன்று எதிர்க்கட்சியாய் உள்ள கட்சியின் தலைவர் ஒரு பெண்

என எங்கெங்கு நோக்கினும் நம்மால் முடியும் என நிரூபித்து வருபவர்கள் பெண்கள்.

ஒருநாட்டில் பெண்கள் முன்னேறினால் அவரது குடும்பம் மட்டுமல்ல சமுதாயமே முன்னேறும் என்பதில் சந்தேகமில்லை.

அனைவருக்கும் மகளிர்தின வாழ்த்துகள்.

முருங்கைக்காய் சூப்

2011-03-03T04:29:00.000-08:00

தேவையானவை:

முருங்கைக்காய் 3

பயத்தம்பருப்பு 2 டேபிள்ஸ்பூன்

வெங்காயம் 1

தக்காளி 2

பூண்டு 2 பல்

இஞ்சி 1 துண்டு

மிளகு 1 டீஸ்பூன்

சீரகம் 1 டீஸ்பூன்

பால் 1/2 கப்

சர்க்கரை 1 டீஸ்பூன்

செய்முறை:

முருங்கைக்காயை வேகவைத்து உள்ளிருக்கும் விதைகளை தனியே எடுத்து வைக்கவேண்டும்.

வெங்காயம் தக்காளி இரண்டையும் பொடியாக நறுக்கிக்கொள்ளவேண்டும்.

இதனுடன் பயத்தம்பருப்பு,இஞ்சி,பூண்டு சேர்த்து குக்கரில் ஒரு கப் தண்ணீருடன் வேகவைக்கவேண்டும்.

மிளகு,சீரகம் இரண்டையும் வறுத்து பொடி பண்ணிக் கொள்ளவேண்டும்.

முருங்கைக்காய் விதைகள்,குக்கரில் வைத்த பயத்தம்பருப்பு கலவை இரண்டையும் சிறிது தண்ணீருடன் மிக்சியில்

அரைத்து வடிகட்டிக்கொள்ளவேண்டும்.

பாலில் சோள மாவை கரைத்து இதனுடன் சேர்த்து கொதிக்கவிடவேண்டும்.

தேவையான உப்பும்,சிறிது சர்க்கரையையும் சேர்க்கவேண்டும்.

சூப்பை அருந்துவதற்கு முன்பு மிளகு சீரகப் பொடி சேர்க்கவேண்டும்.

ஓட்ஸ் குக்கீஸ்

2011-02-22T10:41:00.000-08:00

தேவையானவை:

ஓட்ஸ் 1 கப்

மைதா 1 கப்

பட்டைத்தூள் 1 டீஸ்பூன்

(cinnammon powder)

சர்க்கரை 1 கப்

வெண்ணைய் 1/2 கப்

ஆப்பசோடா 1 டீஸ்பூன்

Flax seeds 1 டேபிள்ஸ்பூன்

FLAX SEED

செய்முறை:

Flax seed ஐ மிக்சியில் சிறிது தண்ணீர் விட்டு அரைத்துக்கொள்ளவும்.

ஒரு பாத்திரத்தை எடுத்துக்கொண்டு அதில் மைதா மாவு,ஓட்ஸ் பட்டைத்தூள்,,ஆப்பசோடா நான்கையும் போட்டு நன்கு கலக்கவேண்டும்.

இன்னொரு பாத்திரத்தில் சர்க்கரையையும் வெண்ணையையும் கலக்கவேண்டும்.

அதனுடன் அரைத்த flax seed விழுதினை சேர்த்து பிசையவேண்டும்.

சர்க்கரை,வெண்ணைய்,flax seed விழுது கலவையோடு மைதா மாவு,ஓட்ஸ் மிக்சரை சேர்த்து நன்கு கலக்கவேண்டும்.

சப்பாத்தி மாவு மாதிரி வந்தபின் சிறு சிறு உருண்டைகளாக உருட்டி தட்டவேண்டும்.

Ovan ஐ 350 யில் preheat செய்து cooking time 30 நிமிடம் வைத்து எடுக்க வேண்டும்.

சுவையான ஓட்ஸ் குக்கீஸ் ரெடி.

வெஜ் பிரிஞ்சி

2011-02-20T13:40:00.000-08:00

தேவையானவை:

பாசுமதி அரிசி 2 கப்

பீன்ஸ் 10

காரட் 2

உருளைக்கிழங்கு 2

பட்டாணி 1/2 கப்

பச்சைமிளகாய் 2

தேங்காய்பால் 1 1/2 கப்

நெய் 1 டேபிள்ஸ்பூன்

உப்பு,எண்ணைய் தேவையானவை

-------

அரைக்க:

சோம்பு 1 டீஸ்பூன்

கசகசா 1/2 டீஸ்பூன்

முந்திரிபருப்பு 10

பூண்டு 4 பல்

-----

தாளிக்க:

பட்டை 1 துண்டு

லவங்கம் 2

------

செய்முறை:

பாசுமதி அரிசியை 15 நிமிடம் தண்ணீரில் ஊறவைத்து வடிகட்டவும்.தண்ணீர் நன்றாக வடிந்ததும் நெய்யில் அரிசியை

5 நிமிடம் வறுக்கவேண்டும்.

பீன்ஸ்,காரட் இரண்டையும் பொடியாக நறுக்கவும்.

உருளைக்கிழங்கை தோலுரித்து பொடியாக நறுக்கிக்கொள்ளவும்.

பச்சை மிளகாயை குறுக்கே வெட்டிக்கொள்ளவும்.

அரைக்கக் கொடுத்துள்ளவைகளை விழுது போல அரைக்கவும்.

----

கடாயில் எண்ணைய் வைத்து பட்டை,லவங்கம் தாளித்து பொடியாக நறுக்கிய பீன்ஸ்,காரட்,உருளைக்கிழங்கு,

பட்டாணி,பச்சைமிளகாய் எல்லாவற்றையும் வதக்கவேண்டும்.அரைத்த விழுது,உப்பு சேர்த்து நன்றாக வதக்கவேண்டும்.

வறுத்த பாசுமதி அரிசியுடன் தேங்காய்பால் 1 1/2 கப்.தண்ணீர் 1 1/2 கப் வதக்கிய காய்கறி கலவை எல்லாவற்றையும் நன்றாக கலந்து ele.cookerல்

வைக்கவேண்டும்.

onionரெய்தா,குருமா இரண்டும் இதற்கு ஏற்றது.

ஸ்வீட் பொடேடோ ஃப்ரை

2011-02-17T17:48:00.000-08:00

தேவையானவை:

சர்க்கரைவள்ளிக் கிழங்கு 2

மஞ்சள்தூள் 1 டீஸ்பூன்

மிளகாய் தூள் 2 டீஸ்பூன்

ஆலிவ் ஆயில் 1 டேபிள்ஸ்பூன்

உப்பு தேவையானது

---

செய்முறை:

சர்க்கரைவள்ளிக் கிழங்கை தோலை உரித்துவிட்டு நீட்ட வாக்கில் 2 அங்குல துண்டுகளாக நறுக்கி கொள்ளவும்.

அதில் உப்பு,மஞ்சள்தூள்,மிளகாய் தூள் சேர்த்து ஆலிவ் ஆயில் ஊற்றி நன்கு பிசிற வேண்டும்.

----

Ovan ஐ 425 F ல் preheat செய்து cooking time 30 நிமிடங்கள் வைத்து எடுக்கவேண்டும்.

முறுகலான ஸ்வீட் பொடேடோ ஃப்ரை ரெடி.

அவகோடா( Avocado) சாலட்

2011-02-15T07:57:00.000-08:00

தேவையானவை:

தக்காளி 2

Avocado 2

வெங்காயம் 2

வெள்ளரிக்காய் 1

வினிகர் 1 டேபில்ஸ்பூன்

எலுமிச்சம்பழம் 1

ஆலிவ் எண்ணைய் 1 டேபிள்ஸ்பூன்

மிளகு தூள் 1 டேபிள்ஸ்பூன்

கொத்தமல்லித்தழை சிறிதளவு

செய்முறை:

Avocado வை குறுக்கு வாட்டில் வெட்டி உள்ளே இருக்கும் கொட்டைகளை எடுத்துவிட்டு சிறுசிறு துண்டுகளாக வெட்டிக்கொள்ளவும்.

தக்காளி,வெங்காயம்,வெள்ளரிக்காய் மூன்றையும் பொடியாக நறுக்கிகொள்ளவும்.

ஒரு அகண்ட பாத்திரத்தை எடுத்துக்கொண்டு நறுக்கிய எல்லாவற்றையும் போட்டு மேலே மிளகுத்தூள்,வினிகர் சேர்த்து Olive oil யை பரவலாக ஊற்றவும்.அதன் மேல்

எலுமிச்சம்பழத்தை சிறு சிறு வட்டமாக நறுக்கி வைத்து பொடியாக நறுக்கிய கொத்தமல்லித்தழையை தூவவும்.

அரைமணிநேரம் ஊறவைத்து சாப்பிடலாம்.

Avocado ல் நிறைய விட்டமின் சத்துக்கள் உண்டு,எல்லா சூப்ப்ர் மார்க்கெட்டிலும் கிடைக்கும்.

வெஜ் கைமா கறி

2011-02-13T13:15:00.000-08:00

தேவையானவை:
வெங்காயம் 2
தக்காளி 3
சோயா பீன்ஸ் 1 கப்
காரட் 2
பட்டாணி 1 கப்
உருளைக்கிழங்கு 2
பச்சைமிளகாய் 2
மஞ்சள்தூள் 1 டீஸ்பூன்
மிளகாய் தூள் 1 டீஸ்பூன்
உப்பு,எண்ணைய் தேவையானவை
கொத்தமல்லித்தழை சிறிதளவு
--------
அரைக்க:
இஞ்சி 1 துண்டு
பூண்டு 2 பல்
சோம்பு 1 டீஸ்பூன்
தேங்காய் துருவல் 1 கப்
முந்திரிபருப்பு 5
மிளகாய் தூள் 1 டீஸ்பூன்
தனியா தூள் 1 டீஸ்பூன்
--------
தாளிக்க:
கடுகு 1 டீஸ்பூன்
கறிவேப்பிலை சிறிதளவு
பெருங்காய்த்தூள் 1 டீஸ்பூன்
-----
செய்முறை:

வெங்காயம்,தக்காளி,காரட் மூன்றையும் பொடியாக நறுக்கிக் கொள்ளவும்.
உருளைக்கிழங்கை தோலுரித்து பொடியாக நறுக்கி உப்பு,மஞ்சள்தூள்,மிளகாய் தூள்
சேர்த்து எண்ணையில் வறுத்துக்கொள்ளவும்.
தக்காளியை எண்ணையில் வதக்கி பேஸ்டு மாதிரி செய்துகொள்ளவும்.
அரைக்கக்கொடுத்துள்ள பொருட்களை வறுத்து விழுது போல அரைத்துக்கொள்ளவும்.
--------
ஒரு கடாயில் எண்ணைய் வைத்து தாளிக்க வேண்டியவைகளை தாளித்து வெங்காயத்தை பொன்னிறமாக வதக்கவும்.
அதனுடன் சோயா பீன்ஸ்,காரட்,பட்டாணி,குறுக்கே நறுக்கிய பச்சைமிளகாய் எல்லாவற்றையும் மஞ்சள்தூள் சேர்த்து வதக்கவும்.
எல்லா காய்கறிகளும் நன்றாக வதங்கியவுடன் சிறிது தண்ணீர் உப்பு சேர்த்து கொதிக்கவிடவும்.
பின்னர் தக்காளி பேஸ்டு,அரைத்த விழுது சேர்த்து கொதிக்கவிடவும்.
கடைசியில் வறுத்த உருளைக்கிழங்கை போட்டு ஒரு பிரட்டு பிரட்டி இறக்கவும்.
கொத்தமல்லித் தழையால் அலங்கரிக்கவும்.

முப்பருப்பு தால்

2011-02-08T07:16:00.000-08:00

தேவையானவை:

துவரம்பருப்பு 1/4 கப்

பயத்தம்பருப்பு 1/4 கப்

மசூர் பருப்பு 1/4 கப்

வெங்காயம் 1

தக்காளி 1

------

மஞ்சள்தூள் 1/2 டீஸ்பூன்

பெருங்காயத்தூள் 1/2 டீஸ்பூன்

சாம்பார் பொடி 1 டீஸ்பூன்

இஞ்சிபூண்டு விழுது 1 டீஸ்பூன்

சீரகம் 1 டீஸ்பூன்

கொத்தமல்லித்தழை 1/4 கப் (ஆய்ந்தது)

உப்பு தேவையானது

-------

தாளிக்க:

நெய் 1 டேபிள்ஸ்பூன்

கடுகு 1 டீஸ்பூன்

கறிவேப்பிலை சிறிதளவு

-----

செய்முறை:

வெங்காயம் தக்காளி இரண்டையும் பொடியாக நறுக்கிக் கொள்ளவும்.

குக்கரில் வைக்கக்கூடிய ஒரு பாத்திரத்தை எடுத்துக்கொண்டு அதில் முதலில்

இரண்டு கப் தண்ணீர் வைத்து அதனுடன் பொடியாக நறுக்கிய வெங்காயம் தக்காளி சேர்த்து

அதன் மேல் மஞ்சள் தூள்,பெருங்காயத்தூள்,சாம்பார்பொடி,இஞ்சிபூண்டு விழுது,சீரகம்,

கொத்தமல்லித்தழை,தேவயான உப்பு ("தேவையானவை" யில் குறிப்பிட்ட எல்லாவற்றையும்) சேர்த்து

நன்கு கலந்து அப்படியே குக்கரில் வைத்து 5 விசில் விடவேண்டும்.

குக்கரில் இருந்து எடுத்து நெய்யில் கடுகு,கறிவேப்பிலை தாளிக்கவேண்டும்.

-------

இந்த தால் செய்வது மிகவும் சுலபம்.சாதத்தோடும் பிசைந்து சாப்பிடலாம்.

சப்பாத்தி,பூரிக்கு ஏற்ற sidedish

கல் தோசை

2011-02-06T14:46:00.000-08:00

தேவையானவை:

புழுங்கலரிசி 1 கப்

பச்சரிசி 1 கப்

உளுத்தம்பருப்பு 1 கப்

வெந்தயம் 1 டீஸ்பூன்

உப்பு, நல்லெண்ணய் தேவையானது

செய்முறை:
புழுங்கலரிசி,பச்சரிசி,உளுத்தம்பருப்பு,வெந்தயம் நான்கையும் ஒன்றாக 8 மணிநேரம் ஊறவைத்து நைசாக அரைக்கவும்.

பின்னர் தேவையான உப்பு சேர்த்து கலக்கவும்.

தோசை மாவு கெட்டியாகவும் இல்லாமல் மிகவும் நீர்த்தும் இல்லாமல் மிதமான பதத்தில் இருக்கவேண்டும்.

மாவு புளிக்க வேண்டிய அவசியமில்லை.அரைத்த உடனே வார்க்கலாம்.

தோசை வார்க்கும் போது தோசைக்கல் சூடானதும் எண்ணைய் தடவி ஒரு கரண்டி மாவை மெல்லியதாக வார்க்கவேண்டும்.

தோசை முழுவதும் வெந்ததும் திருப்பி போடாமல் அப்படியே எடுத்து விடவும்.

சிவப்பு குடமிளகாய் சட்னி

2011-02-04T07:55:00.000-08:00

தேவையானவை:

சிவப்பு குடமிளகாய் 1

வெங்காயம் 1

தக்காளி 1

பூண்டு 2 பல்

இஞ்சி 1 துண்டு

புளி சிறிதளவு

சிவப்பு மிளகாய் 3

உப்பு,எண்ணய் தேவையானது

---------

தாளிக்க:

கடுகு 1 டீஸ்பூன்

உளுத்தம்பருப்பு 1 டீஸ்பூன்

சீரகம் 1/2 டீஸ்பூன்

கறிவேப்பிலை சிறிதளவு

-------

செய்முறை:

சிவப்பு குட மிளகாயை பொடியாக நறுக்கி சிறிது எண்ணையில் வதக்கிக்கொள்ளவும்.

வெங்காயம்,தக்காளி,பூண்டு,இஞ்சி நான்கையும் பொடியாக நறுக்கி எண்ணையில் வதக்கிக்கொள்ளவும்.

சிவப்பு மிளகாய்,புளி இரண்டையும் தனித்தனியே எண்ணையில் வறுத்துக்கொள்ளவும்.

எல்லாவற்றையும் தேவையான உப்புடன் மிக்சியில் நைசாக அரைக்கவேண்டும்.

கடைசியில் கடுகு,உளுத்தம்பருப்பு,சீரகம்,கறிவேப்பிலை தாளிக்கவேண்டும்.

சிவப்பு குட மிளகாய் சட்னி இட்லி,தோசை,பொங்கல் ஆகியவற்றிற்கு ஏற்ற sidedish.

ஆஃப்கான் ரெய்தா

2011-02-02T07:39:00.000-08:00

தேவையானவை:

புதினா 1 கப் (ஆய்ந்தது)

கொத்தமல்லித் தழை 1 கப் (ஆய்ந்தது)

பச்சைமிளகாய் 2

தக்காளி 1

வெள்ளரிக்காய் 1

தயிர் 3 கப்

உப்பு தேவையானது

செய்முறை:

வெள்ளரிக்காயை தோலை எடுத்துவிட்டு பொடியாக நறுக்கிக்கொள்ளவும்.

தக்காளியை பொடியாக நறுக்கிக்கொள்ளவும்.

புதினா,கொத்தமல்லித்தழை,பச்சைமிளகாய் மூன்றையும் சிறிது தயிர் விட்டு மிக்சியில் நைசாக அரைத்துக்கொள்ளவும்.

ஒரு அகண்ட பாத்திரத்தை எடுத்துக்கொண்டு அதில் அரைத்த விழுது,மீதமுள்ள தயிர்,பொடியாக நறுக்கிய வெள்ளரிக்காய்,

தக்காளி தேவையான உப்பு எல்லாவற்றையும் சேர்த்து நன்கு கலக்கவும்.

ஆஃப்கான் ரெய்தா ரெடி.
புலவ்,பிரியாணி,மிக்ஸட் ரைஸ் எல்லாவற்றிற்கும் இந்த ரெய்தா ஏற்றது.

பிரட் சாண்ட்விச்

2011-02-01T07:24:00.000-08:00

தேவையானவை:
whole wheat bread 6 துண்டுகள்
வெண்ணைய் 1 டேபிள்ஸ்பூன்
ஆலிவ் ஆயில் 2 டீஸ்பூன்
------
உருளைக்கிழங்கு 2
வெங்காயம் 1
காரட் 2
பட்டாணி 1/2 கப்
மிளகாய் தூள் 1 டீஸ்பூன்
மஞ்சள்தூள் 1/2 டீஸ்பூன்
கடுகு 1 டீஸ்பூன்
உளுத்தம்பருப்பு 1 டீஸ்பூன்
உப்பு,எண்ணைய் தேவையானது
----
செய்முறை:

உருளைக்கிழங்கை Microwaved 'H' ல் 5 நிமிடம் வைத்து எடுத்து தோலுரித்து மசித்துக்கொள்ளவும்.
வெங்காயத்தை பொடியாக நறுக்கிக் கொள்ளவும்.
காரட்டை துருவிக் கொள்ளவும்.
---
ஒரு கடாயில் எண்ணைய் வைத்து கடுகு உளுத்தம்பருப்பு தாளித்து வெங்காயத்தை பொன்னிறமாக வதக்கவும்.
அதனுடன் மசித்த உருளைக்கிழங்கு,துருவிய காரட்,பட்டாணி,தேவையான உப்பு சேர்த்து வதக்கவும்.
மஞ்சள் தூள்,மிளகாய் தூள் சிறிது எண்ணைய் சேர்த்து வதக்கவும்.தனியே எடுத்து வைக்கவும்.
இரண்டு பிரட் துண்டுகளை எடுத்துக்கொண்டு உள்பக்கம் வெண்ணைய் அல்லது ஆலிவ் ஆயில் தடவி
ரெடியாக உள்ள மசாலாவை ஒரு பக்கம் பரவலாக தடவி இன்னொரு துண்டால் மூடி அப்படியே பிரட் சாண்ட்விச் மேக்கரில் வைக்கவும்.
சுவையான பிரட் சாண்ட்விச் ரெடி.

பெற்றோர்/மற்றோர் கவனத்திற்கு....

2011-01-30T14:59:00.000-08:00

பதிவர் ஜலீலா அவர்கள் ஏன் இந்தக் கொடுமை என ஒரு இடுகை இட்டிருந்தார்.அதை படித்ததும் சில விஷயங்களை அனைவரிடமும் பகிர்ந்து கொள்ள தோன்றியது.அதுவே இந்த இடுகை.

சமீப காலங்களில் குழந்தைகள் கடத்தல் பற்றி அதிகம் கேள்விப்படுகிறோம்.

பள்ளிக்குழந்தைகள் ஆனாலும் சரி மற்ற குழந்தைகள் ஆனாலும் சரி அவர்கள் வீட்டு டிரைவர்,வேலைசெய்பவர்,அல்லது குழந்தைகளுக்கு தெரிந்தவர் குழந்தைகளை கடத்திசென்று.....சிறுமிகளை கற்பழிப்பதும்....அல்லது குழந்தைகள் திரும்ப வேண்டுமானால் பெற்றோரிடம் பணம் கேட்டும் வரும் செய்திகளை

அடிக்கடி பத்திரிகைகளில் பார்க்கமுடிகிறது.

அதேபோல சமீபத்தில் பெங்களுரில் கால் செண்டரில் இரவு வேலை முடிந்து...வேனில் திரும்புகையில் ஒரு பெண் கடத்தப்பட்டு,கற்பழிக்கப்பட்டு,கொலையும் செய்யப்பட்ட செய்தியையும் அறிவோம்.

இப்போதெல்லாம் BPO வில் வேலை செய்யும் பல பெண்கள் இரவு வேலைக்கு செல்கிறார்கள்.இவர்கள் தனியாக ஏற்பாடு செய்து கொண்டோ அல்லது ஆட்டோ,டாக்சி யிலேயோ வீடு திரும்ப வேண்டியுள்ளது.அது போன்ற சமயங்களில் சிலரால் பாலியல் தொந்தரவுக்கும் ஆளாகிறார்கள்.இது பற்றி காவல் துறையில்வழக்குகள் குவிந்து வருகின்றன.

இது பற்றியெல்லாம் எண்ணியபோது தற்செயலாக இந்த நிறுவனத்தின் வெப்சைட் கண்ணில் பட்டது.

இந்நிறுவனம் பேஜர் போன்ற ஒரு கருவியை தருகிறார்கள்.அதை குழந்தைகளோ வேலைக்கு போகும் பெண்களோ வைத்துக்கொண்டால் ...தங்களுக்கு யார் மீதாவது சந்தேகம் ஏற்படும் நிலையில் இருந்தால் அந்தக் கருவியை ஐந்து வினாடிகள் மட்டுமே கிளிக் செய்தால் போதும்.அவர்கள் இருக்குமிடம் வீட்டில் உள்ளவர்கள் மொபைலில் தெரிந்துவிடும்.நிலைமை அறிந்து வீட்டிலுள்ளோர் தனியாகவோ,அல்லது காவல் துறை உதவியுடனோ காப்பாற்றி விடமுடியும்.

தவிர்த்து,இன்று பரவலாக மனிதர்களுக்கு குறிப்பாக வயதானவர்களுக்கு அல்சைமர்(alzheimer) எனப்படும் மறதிக்குறைவு அதிகரித்து வருகிறது.

மூளையில் உள்ள செல்கள் அழிந்து வருவதாலே இந்த குறைபாடு ஏற்பட்டு வருவதாக தெரிகிறது.இதற்கு முழு நிவாரணம் கண்டுபிடிக்க முடியவில்லை.அதனால் அல்சைமர் உள்ள பெரியவர்கள் வீட்டை விட்டு வெளியே சென்றால் வீடு இருக்குமிடம் தெரியாமல் மறந்து போய் மணிகணக்காக எங்கெங்கோ திரிய ஆரம்பித்துவிடுகிறார்கள்.வீட்டிலுள்ளவர்கள் கவலை மேலிட அவரை நகரம் முழுவதும் தேட ஆரம்பிப்பதும்,காவல் துறையில் காணாமல் போனவர் பற்றி புகார் செய்வதுமாக உள்ளது.

.ஆகவே அப்படிபட்டவர்களுக்கும் வீட்டைவிட்டு வெளியே அவர்கள் போகும் போது திரும்ப வழி மறந்தாலும் அவர் இருக்குமிடத்தை கணிணியின் மூலம் கூகுள் மேப்பில் வெப்சைட் மூலம் அவர்கள் இருக்குமிடம் அறிந்து அழைத்து வந்துவிடலாம்.

எதிர்காலத்தில் இந்த சேவை மிகவும் பயனுள்ளதாக அனைவருக்கும் அமையக்கூடும் என்று தோன்றுகிறது.

பயத்தம்பருப்பு தோசை

2011-01-27T16:47:00.000-08:00

தேவையானவை:
பயத்தம்பருப்பு 3 கப்
புழுங்கலரிசி 3/4 கப்
பச்சைமிளகாய் 5
சீரகம் 1 டீஸ்பூன்
இஞ்சி 1 துண்டு
கொத்தமல்லித்தழை 1 கப் (ஆய்ந்தது)
உப்பு,எண்ணைய் தேவையானது
----
செய்முறை:

பயத்தம்பருப்பு அரிசி இரண்டையும் நான்கு மணிநேரம் ஊறவைக்கவும்.
ஊறவைத்த அரிசி,பருப்பை வடிகட்டி அதனுடன் பச்சைமிளக்காய்,சீரகம்,
இஞ்சி,கொத்தமல்லித்தழை,தேவையான உப்பு ஆகியவற்றை சேர்த்து மிக்சியில்
அரைக்கவேண்டும்.
அடுப்பில் தோசைக்கல்லை வைத்து கல் காய்ந்ததும் மாவை ஒரு கரண்டி ஊற்றி
மெல்லிசாக வார்க்கவேண்டும்.இறுபுறமும் எண்ணைய் விட்டு பொன்னிறமாக வந்ததும் எடுக்கவேண்டும்.

இந்த தோசையை அரைத்த உடனே சாப்பிடலாம்..
தக்காளி சட்னி,வெங்காய சட்னியுடன் சாப்பிட நன்றாக இருக்கும்.

வெள்ளரிக்காய் பச்சடி

2011-01-26T06:32:00.000-08:00

தேவையானவை:

வெள்ளரிக்காய் 2

தயிர் 1 கப்

தேங்காய் துருவல் 1/4 கப்

பச்சைமிளகாய் 2

கடுகு 1 டீஸ்பூன்

உளுத்தம்பருப்பு 1 டீஸ்பூன்

உப்பு,எண்ணைய் தேவையானது

செய்முறை:

வெள்ளரிக்காயை தோலை நீக்கிவிட்டு பொடியாக நறுக்கிக்கொள்ளவும்.

தேங்காய் துருவல்,பச்சைமிளகாய் இரண்டையும் ஒரு டேபிள்ஸ்பூன் தயிர் சேர்த்து விழுதாக அரைத்துக்கொள்ளவும்.

ஒரு அகண்ட பாத்திரத்தை எடுத்துக் கொண்டு நறுக்கிய வெள்ளரிக்காய்,அரைத்த விழுது,மீதமுள்ள தயிர்,தேவையான உப்பு

சேர்த்து நன்கு கலக்கவும்.கடைசியில் கடுகு உளுத்தம்பருப்பு தாளிக்கவும்.

சாதாரணமாக புலவ்,பிரியாணிக்கு ரெய்தாவைப் போல இந்த பச்சடியும் நன்றாக இருக்கும்.

வெஜிடபிள் சிலி

2011-01-23T13:07:00.000-08:00

வெஜிடபிள் சிலி என்பது ஒரு வகையான Stew ஆகும்.காய்கறிகளும் தானியங்களும் சேர்ந்த கலவை.

இதனை சூப் என்றும் கூறலாம்.ஆனால் சூப்பைவிட கொஞ்சம் திக்காக இருக்கும்.இதனை சாதத்தோடு சேர்ந்து சாப்பிட ஒரு வேளை உணவாகும்.

.டின்னருக்கு bread ஐ toast பண்ணி இத்துடன் சாப்பிடலாம்.

தேவையானவை:

ராஜ்மா (white) 1/4 கப்

ராஜ்மா (black) 1/4 கப்

கொண்டக்கடலை 1/4 கப்

வெங்காயம் 1

தக்காளி 2

கொடமிளகாய் (green) 1

கொடமிளகாய் (red) 1

கார்ன் 1/4 கப்

பட்டாணி 1/2 கப்

வெஜிடபிள் ஸ்டாக் 1 கப்

தண்ணீர் 1 கப்

உப்பு,எண்ணைய் தேவையானது

----

தனியா தூள் 1/2 டீஸ்பூன்

சீரகத்தூள் 1/2 டீஸ்பூன்

காஷ்மீரி சில்லி தூள் 1 டீஸ்பூன்

ஆம்சூர் பொடி 1/2 டீஸ்பூன்

----

பூண்டு 4 பல்

கொத்தமல்லி தழை சிறிதளவு

cream 2 டேபிள்ஸ்பூன்

செய்முறை:

ராஜ்மா இரண்டு வகைகளையும்,கொண்டக்கடலையையும் ஒருமணிநேரம் ஊறவைத்து குக்கரில் வைத்து எடுக்கவும்.(மூன்று விசில்).

வெங்காயம்,குடமிளகாய் இரண்டையும் பொடியாக நறுக்கிக்கொள்ளவும்.

தக்காளியை வென்னீரில் போட்டு தோலுரித்து வதக்கிக்கொள்ளவும்.

பூண்டை சிறு சிறு துண்டுகளாக நறுக்கிக்கொள்ளவும்.

-----

ஒரு அகண்ட பாத்திரத்தை அடுப்பில் வைத்து எண்ணைய் சிறிது விட்டு வெங்காயத்தை பொன்னிறமாக வதக்கவும்.

அதில் குக்கரிலிருந்து எடுத்த ராஜ்மா,கொண்டக்கடலையை சேர்க்கவும்.

இருவகை கொடமிளகாயையும்,கார்ன், பட்டாணி,பொடியாக நறுக்கிய பூண்டையும் சேர்க்கவும்.

இத்துடன் வெஜிடபிள் ஸ்டாக் ஒரு கப்,தண்ணீர் ஒரு கப் தேவையான உப்பு சேர்த்து கொதிக்கவிடவும்.

பின்னர் தக்காளி பேஸ்டுடன் தனியா தூள்,சீரக்த்தூள்,காஷ்மீரி சில்லி தூள்,ஆம்சூர் பொடி சேர்த்து மீண்டும் நன்றாக கொதிக்க விடவும்.

அதிக தண்ணீர் விடவேண்டாம்.

கடைசியில் கொத்தமல்லித்தழையால் அலங்கரிக்கவும்.

சாப்பிடும் முன்பு fresh cream ஐ மேலே போட்டு சாப்பிடவும்.

இட்லி மிளகாய்ப் பொடி

2011-01-20T13:39:00.000-08:00

தேவையானவை:

கடலைப் பருப்பு 1 1/2 கப்

உளுத்தம்பருப்பு 1/2 கப்

சிவப்பு மிளகாய் 1 1/2 கப்

கொப்பரை 1 1/2 கப் (துண்டுகள்)

புளி ஒரு எலுமிச்சை அளவு

வெல்லம் 1/4 கப் (பொடித்தது)

பெருங்காயம் 1 துண்டு

கடுகு 1 டீஸ்பூன்

கறிவேப்பிலை ஒரு கொத்து

உப்பு,எண்ணைய் தேவையானது

செய்முறை:

கடலைப் பருப்பையும் உளுத்தம்பருப்பையும் எண்ணையில் பொன்னிறமாக வறுக்கவேண்டும்.

சிவப்பு மிளகாயை சிறிது எண்ணையில் தனியாக வறுக்கவேண்டும்.

கொப்பரையை சிறு சிறு துண்டுகளாக நறுக்கி சிறிது எண்ணைய் சேர்த்து நன்றாக பொன்னிறமாக வறுக்கவேண்டும்.

புளி,உப்பு,பெருங்காயம் மூன்றையும் தனித்தனியே வறுத்து எடுக்கவேண்டும்.

-----

மிக்சியில் அரைக்கும்போது கொப்பரையை முதலில் கரகரப்பாக அரைத்து வைக்கவும்.

அடுத்து கடலைப் பருப்பு,உளுத்தம்பருப்பு,புளி,உப்பு எல்லாவற்றையும் அரைக்கவேண்டும்.

சிவப்பு மிளகாயை தனியே நைசாக அரைக்கவேண்டும்.

கடைசியில் எல்லாவற்றையும் வெல்லத்தோடு சேர்த்து ஒரு சுற்று சுற்றவேண்டும்.

அரைத்த இட்லிப் பொடியை ஒரு அகண்ட பாத்திரத்தில் கொட்டி கடுகு கறிவேப்பிலை தாளித்து

நன்றாக கலந்து எடுத்து வைக்கவேண்டும்.

ரவா தோசை

2011-01-18T13:52:00.000-08:00

தேவையானவை:
ரவா 1 கப்
இட்லி மாவு or
அரிசி மாவு 1 கப்
மைதா மாவு 1 கப்
மிளகு 10
சீரகம் 1 டேபிள்ஸ்பூன்
பச்சைமிளகாய் 3
இஞ்சி 1 துண்டு
கறிவேப்பிலை சிறிது
-------
செய்முறை:

ரவையை 1 1/2 கப் தண்ணீரில் அரை மணிநேரம் ஊறவைக்கவும்.
இட்லி மாவையும் மைதாமாவையும் தண்ணீரில் கரைத்து உப்பு சேர்க்கவும்.
ஊறவைத்த ரவாவை அதனுடன் கலந்து சற்று நீர்க்க கரைக்கவும்.
மிளகு,சீரகம்,கறிவேப்பிலை மூன்றையும் எண்ணையில் பொறித்து போடவும்.
பச்சைமிளகாய்,இஞ்சி இரண்டையும் பொடியாக நறுக்கி பச்சையாக போடவும்.
-------
தோசைக்கல்லை அடுப்பில் வைத்து கல் காய்ந்ததும் மாவை கரண்டியில் எடுத்து
அள்ளி தெளித்த மாதிரி லேசாக ஊற்றி இருபுறமும் எண்ணைய் விட்டு மொறு மொறு என்று வந்ததும் எடுக்கவும்.

இதற்கு சரியான side dish தக்காளி சட்னி,தேங்காய் சட்னி.

வெஜ் பரோட்டா

2011-01-16T14:32:00.000-08:00

தேவையானவை:
கோதுமைமாவு 2 கப்
உருளைக்கிழங்கு 2
முட்டைக்கோஸ் 1 கப் (பொடியாக நறுக்கியது)
பட்டாணி 1 கப்
மஞ்சள் தூள் 1/2 டீஸ்பூன்
காரப்பொடி 1 டீஸ்பூன்
மசாலாதூள் 1 டீஸ்பூன்
உப்பு,எண்ணைய் தேவையானது
------
தாளிக்க:
கடுகு 1/2 டீஸ்பூன்
உளுத்தம்பருப்பு 1 டீஸ்பூன்

------

செய்முறை:

கோதுமைமாவில் தேவையான உப்பு,தண்ணீர் சேர்த்து நன்கு பிசையவும்.
உருளைக்கிழங்கை microwave 'H' ல் 5 நிமிடம் வைத்து எடுக்கவும்.தோலுரித்து மசித்துக் கொள்ளவும்.
முட்டைக்கோஸை microwave 'H' ல் 5 நிமிடம் வைத்து எடுத்து மசித்துக்கொள்ளவும்.
பட்டாணியை வேகவைத்து எடுத்து வைக்கவும்.

------

கடாயில் எண்ணைய் வைத்து கடுகு உளுத்தம்பருப்பு தாளித்து மசித்துவைத்த உருளைக்கிழங்கு,முட்டைக்கோஸ்,
வேகவைத்த பட்டாணி,தேவையான உப்பு சேர்த்து பிரட்டவும்.
அதனுடன் மஞ்சள்தூள்,காரப்பொடி,மசாலாத்தூள் சிறிது எண்ணைய் சேர்த்து பிரட்டவும்.
தண்ணீர் சேர்க்கவேண்டாம். எல்லாம் ஒன்று சேர்ந்ததும் சிறு சிறு உருண்டைகளாக உருட்டி வைக்கவும்.

-----
பிசைந்த சப்பாத்தி மாவை சிறு சிறு உருண்டைகளாக்கி ஒவ்வொரு உருண்டையையும் சப்பாத்தி அளவு இட்டு
அதன் நடுவில் செய்து வைத்திருந்த வெஜ் உருண்டை ஒன்றை வைத்து எல்லா ஓரங்களையும் மையப்பகுதி நோக்கி
மசாலா தெரியாதவாறு மூடவும்.மீண்டும் சப்பாதி போல் தேய்க்கவும்.

அடுப்பில் தவாவை வைத்து இட்டு வைத்த பரோட்டாவை போட்டு இறுபுறமும் எண்ணைய் விட்டு பொன்னிறமாக வந்ததும் எடுக்கவும்.